Håpar på utvida satsing på toppidrett i skulen

– Dersom vi ønskjer at ungdommen skal vere her i fylket, må vi leggje til rette for dei. Og vi må gje dei gode opplevingar som gjer at dei har lyst til å komme tilbake, seier Anne Leversund.

Ho er organisasjonssjef i Sogn og Fjordane idrettskrins, og har følgt godt med på debatten rundt ungdom som flyttar ut av fylket for å satse på toppidrett.

• LES OGSÅ: Han er Norges beste både sommar og vinter

Sist veke hadde idrettskrinsen møte med særkrinsane, skulane og fylkeskommunen, der dei konkluderte med at ordninga «spissa idrettstilbod for potensielle toppidrettsutøvarar» i den vidaregåande skulen har fungert godt.

– Vi har lagt til rette for at idrettsungdom kan vere i eige fylke, drive idretten sin og bli tatt omsyn til i skulekvardagen – samstundes som dei blir følgde opp på det faglege og idretten, seier Leversund.

• LES OGSÅ: Flytta heimanfrå for å satse på ski som 15-åring - trenar meiner han kunne blitt heime

Idretten håpar at tilbodet kan bli utvida

Det spissa idrettstilbodet vart i haust føreslege nedlagt av fylkesdirektøren for utdanning. Seinare vart forslaget lagt bort av hovudutvalet for opplæring.

Tilbodet gjeld ungdommar som vil kombinere vidaregåande opplæring med sin idrett. Anten det er fotball i Sogndal, volleyball i Førde eller skiskyting i Stryn.

– Vi er unisont samde om at dette har fungert etter intensjonen. Og ønskesituasjonen for idretten er at vi kunne fått utvida ordninga, slik at det omfatta fleire idrettar, seier Leversund.

– Vi har vore i kontakt med fylkeskommunen og bede om å få vidareført ordninga slik ho er i dag. Men signala frå særkrinsane og skulane er at dei ønskjer at ordninga blir utvida, forklarer organisasjonssjefen.

• LES OGSÅ: «Er viktigare å hente unge heim att, enn å hindre dei i å flytte vekk»

(Artikkelen held fram under biletet)

Færre ungdommar reiser ut no enn før

Det er no opp til politikarane på fylkestinget å endeleg bestemme om tilbodet om spissa idrettstilbod blir ført vidare eller lagt ned. Vinsten på nedlegging vil kunne vere 750.000 kroner.

Samstundes vil det koste fylkeskommunen om lag 92.000 kroner for kvar elev som vel å flytte ut av fylket for å gå på skule og satse på toppidrett.

• LES OGSÅ: Vil leggje ned for å spare 750.000
• LES OGSÅ: Hovudutvalet går mot fylkesdirektøren – vil behalde toppidrettssatsing

Idrettskrinsen ser for seg at tilbodet kan bli utvida med idrettar som til dømes langrenn, handball og friidrett.

– Evaluering har vist at ordninga har fungert i tråd med intensjonane. Det er færre ungdommar som reiser ut for å ta vidaregåande utdanning no enn før. Vi har dessutan bygd opp kompetanse innad i idretten og i skulemiljøa i fylket, seier Leversund.

– Viktig å vise at vi satsar på ungdom

Ho er oppteken av at samarbeidet med fylkeskommunen har fungert veldig bra.

– Dette handlar å leggje til rette for ungdommane, slik at dei kan vere i trygge og sunne omgjevnader i eige fylke. Vi har ikkje som mål at absolutt alle skal vere her. Men vi strekkjer oss etter det, og vil leggje til rette for at flest mogleg ungdom kan vere her, seier Leversund.

Ho legg til:

– Det er veldig viktig at vi viser at vi satsar på ungdommen, og eg meiner det må vere eitt av verkemidla som må til for at vi skal skjønne kor flott Sogn og Fjordane faktisk er.

• LES OGSÅ: Trenarar orkar ikkje vere med lenger - slit med foreldre som blandar seg inn

(Artikkelen held fram under biletet)

Er først og fremst glad dei berga tilbodet

Norvall Nøringset (SV) er leiar i hovudutvalet for opplæring, og er glad for at dei no ser ut til å ha berga tilbodet om spissa idrettstilbod. Han trur ikkje det blir omkamp om tilbodet fram mot fylkestinget i desember, då det heile blir endeleg avgjort.

– Kva synest du om at idretten no har fått blod på tann?

– Det er flott at dei har ambisjonar, at dei vil meir og at dei vil gje eit endå betre tilbod – det er eg med på med éin gong. Eg ser at det er andre idrettar som også skulle ha hatt dette tilbodet om spissing, seier Nøringset.

– Har fylket råd til fleire spissa idrettslinjer?

– Av og til kan ein spørje seg om vi har råd til å la vere. Reiser idrettsungdom ut av fylket, blir det også eit økonomisk tap for fylkeskommunen. Så dette er noko vi må sjå på, seier han.

• LES OGSÅ: Difor må han jobbe hardare enn alle andre

Nøringset kan ikkje svare på kva tid det kan bli aktuelt å eventuelt sjå på eit eventuelt utvida idrettstilbod i den vidaregåande skulen.

– No må vi berre avvente og sjå korleis økonomien blir – for det er eit økonomisk spørsmål kor mykje vi kan satse. Men uansett kvar vi prøver å finne pengar, er det viktig å få idrettsmiljøa våre på eit så høgt nivå at ungdommen vil bli verande i fylket så lenge som mogleg. Det er eit felles mål for idretten og oss som driv politikk å prøve å ha ungdommen hos oss så lenge som mogleg, seier han.