– Vi har signert ein ny venstreback frå Finland. Han har god erfaring frå utlandet og vert ein god tilvekst når Victor Grodås er skadd, seier Sogndal-trenar Eirik Bakke.
Venstreback Grodås fekk ein korsbandskade då laget var på treningsopphald på Gran Canaria, og er dermed ute første del av sesongen. Truleg er han tilbake i juni.
Raitala har 26 kampar for det finske A-landslaget, samt fleire kampar på aldersbestemte landslag. Han kan også spele som midtstoppar og høgre back.
Trur han vil passe inn i gruppa
Raitala spelte sist i Aalborg og Vestsjælland i Danmark.
– Han har vore i Danmark og spelt og så har han vore innom fleire klubbar. Han har ein god CV, og eg trur han vil gli godt inn i gruppa, seier Bakke.
Bakke legg til at Raitala og Hannu Patronen kjenner kvarandre godt frå før.
I første omgang er kontrakten ut sesongen.
– Så får vi sjå. Det er kjekt å få inn gode, svoltne spelarar som vil noko. Han er ein av dei. Så får Grodås og dei andre ta opp kampen når dei er tilbake, seier Bakke.
Har vore på jakt etter spelaren ei stund
Sogndal har følgt med på Raitala over tid.
– Vi har hatt han i kikkerten. Så har det vore forhandlingar fram og tilbake. Han har også hatt andre alternativ, men vi er glade for at han valde Sogndal, seier Bakke.
Han ser på Raitala som ein spennande tilvekst.
– Det er ein god spelar vi får, og eg trur han kjem til å gli godt inn i laget med mange unge spelarar. Det hjelper godt at han har internasjonal erfaring. Han har vore med på mykje, så eg trur han blir ein god tilvekst for oss, seier Bakke.
Det er førebels ikkje klart om den nye spelaren vert speleklar til treningskampen laurdag mot Brann.
