Gruveavgjerd i det blå

Det har gått nærmare ni år, og selskapet Nordic Mining har brukt over 100 millionar kroner på å planlegge gruvedrift i Vevring i Naustdal.

I staden for å ta ei avgjerd, kravde den raudgrøne regjeringa heile tida at nye rapportar måtte utarbeidast. Over 50 rapportar er no på bordet, men heller ikkje den blå regjeringa greier å bestemme seg.

– Det er på mange måtar respektlaust av regjeringa å ikkje kome til ei avgjerd. Det er veldig, veldig uryddig, seier Hanne Markussen Eek, styreleiar i Norsk Bergindustri.

Næringspolitisk talsmann for Høgre på Stortinget, Gunnar Gundersen, sa i november i fjor at han forventa ei avgjerd like på nyåret.

• Les også: Meiner ventetida er ein politisk skandale

Kritisk til eiga regjering

No er Gundersen kritisk til si eiga regjering.

– Saka låg vel seks, sju år under den raudgrøne regjeringa, og har no snart lege to år under oss. Slik skal det ikkje vere. Vi masar og spør, og får berre beskjed om at saka er børssensitiv. Hadde vi fått vite noko, kunne vi ikkje sagt noko.

– Det er dine eigne som somlar no?

– Vi kan ikkje legge skjul på det.

– Er dette pinleg for Høgre?

– Eg tykkjer vi må kome fram til ei avgjerd. Dette er folk som både har investert og lagt inn veldig mykje ressursar på å få til eit prosjekt, seier Gundersen.

Statssekretær i Kommunaldepartementet, Jardar Jensen (H), forstår reaksjonane.

– Eg skjønar at dei er utolmodige. At ein har halde på i åtte år er altfor dårleg. Vi har jobba ganske intenst med det, og håpar å kome med ei løysing ganske snart. Det vil seie, i alle fall før sommaren, seier han.

– Sjokkerande

Markussen Eek meiner manglande industripolitisk kompetanse i regjeringsapparatet er hovudårsaka til at politikarane har vegra seg for å ta ei avgjerd i alle desse åra.

– Det er sjokkerande. Vi snakkar om at vi er ein industrinasjon, og snakkar om at vi skal satse på industri. Politikarar i Noreg syner at dei har veldig liten kompetanse på dette. Det tykkjer eg er veldig, veldig trist, seier ho.