Kvinna som filma forbikøyringa onsdag føremiddag, ønskjer å vere anonym. Men ho deler gjerne opplevinga.
– Eg var passasjer i bilen, og vi var på veg til jobb. På E39 mellom Sande og Førde, i Gaular kommune, såg vi to semitrailerar som låg i køen framfor oss, seier kvinna.
Ho tok opp mobiltelefonen og tok til å filme, rett og slett fordi den bakarste semitraileren låg svært nær den første.
– Eg ville dokumentere litt av galskapen som er på vegane, seier kvinna.
- LES OGSÅ:
- LES OGSÅ:
Såg nesten ut som éin bil
Ho tenkte med gru på kva som ville skje dersom den første traileren måtte gjere ein bråstogg.
– Bilane låg så tett at dersom ein ikkje visste at det var to som låg eter kvarandre, så såg det ut som éin lastebil med hengar, seier kvinna.
Men trass i at dei følgde med på køyringa, hadde ho aldri i sin villaste fantasi, trudd at traileren ville prøve seg på ei forbikøyring. Strekninga der forbikøyringa skjedde, er på eit parhundre meter, i ein slak motbakke, noko som forlenga forbikøyringa ytterlegare.
– Eg tenkte at dersom det kjem ein bil i mot, så smell det. Han måtte langt inn i svingen, før han fekk lagt seg inn att, fortel kvinna, som prisar seg lukkeleg for at det ikkje kom nokon bil andre vegen.
- LES OGSÅ:
Tok kontakt med politiet
Ho fortel at ho har sett mykje galskap på vegane, slik at det nesten er slik at ein kvir seg til å leggje ut på vegen. Det vert ikkje betre etter dette.
– Akkurat der han la seg ut, er det oversiktleg. Men når ein ikkje kjem seg forbi fort nok, så kjem jo svingen, seier kvinna.
Etter hendinga, valde ho å kontakte politiet. Dei tok innspelet på alvor, og sende ut ei patrulje som stoppa sjåføren i Førde.
- LES OGSÅ:
Mista førarkortet for fire månader
– Det var ei forbikøyring av eit vogntog som ikkje var slik som forbikøyringar skal gå føre seg. Vi har beslaglagt førarkortet til sjåføren i fire månader, samt at han har fått eit førelegg på 5.000 kroner for forholdet, seier lensmann i Førde og Naustdal, Jan Egil Tvinde.
Politiet hadde ei patrulje ute, og dermed gjekk det relativt raskt å få stoppa semitraileren i Førde.
– Både føraren og vogntoget er polske, seier Tvinde.
Sjåføren vedtok førelegget på staden.
– Det betyr at han har erkjent forholdet, seier Tvinde.
- LES OGSÅ:
Hadde vore livsfarleg for møtande bilist
Han likar dårleg situasjonen som er dokumentert på videoen.
– Slik det ser ut på videoen så er det livsfarleg for ein møtande bilist. Det er veldig bra at vi får reagert på slik oppførsel i trafikken, seier Tvinde.
Men han legg til at det er sjeldan kost at politiet får tilsendt denne type bevis i ei slik sak.
– Det er sjeldan, men med nymotens telefonar så kan det vel fort bli meir av denne type bevisførsel. Viss det kan hindre farlege situasjonar i trafikken, så er det positivt, seier Tvinde.
Han torer ikkje tenkje på kva som hadde skjedd dersom det hadde komme ein bil i mot.
– Det er fatale følgjer dersom det er front mot front mellom vogntog og personbil, seier Tvinde.
- LES OGSÅ: