Skadde eldgammal runestein under brøyting - no får kommunen 70.000 i bot

Det skriv Sogn Avis.

Ordførar i Sogndal, Jarle Aarvoll (Ap) har allereie vedteke bota.

– Storleika på bota tek ein til vitande. Dette er ei sak som har teke lang tid, og politiet må skave på årsakene til det. Men kommunen har sagt frå dag ein, viss vi var skuld i dette, så er dette ei hending som ikkje skal skje. Det er berre å beklage, seier Aarvoll til avisa.

Han understrekar at området for ettertida vil bli meir sikra.

• LES OGSÅ: 1000 år gammal runestein øydelagd av snørydding
• LES OGSÅ: - Kjempetap om steinen er øydelagd

Kritikk for lang oppklaringstid

Den nesten to meter høge runesteinenn ved Stedje kyrkje i Sogndal fekk stå i fred i nær tusen år. Men då det skulle ryddast snø vinteren 2012, gjekk det gale.

Professor i geologi ved Høgskulen i Sogn og Fjordane, Stein Bondevik, trudde ikkje sine eigne auge då han fekk sjå runesteinen.

– Eg vart heilt sjokka då eg kom opp og såg kva som hadde skjedd, sa Bondevik til NRK.no.

Politiet har fått kritikk fordi det har teke så lang tid å oppklare brotsverk mot verdifulle kulturminne. Dei siste tjue åra har kulturminneforvaltninga i Sogn og Fjordane meldt sju kulturminnebrotsverk til politiet.

Politiet har i snitt brukt halvtanna år på å oppklare desse sakene.

• LES OGSÅ: Kan ende opp med klekkeleg bot
• LES OGSÅ: Arkeolog fryktar dette kan skje langt oftare

Vart reparert av fagfolk

Runesteinen på Stedje har etter alt å dømme stått på ei grav frå eldre jarnalder, om lag 500 år etter Kristus. Sidan har ein eller annan rissa inn runene om lag 600 år seinare, på 1100-talet.

Hausten 2013 var steinen tilbake i si fordoms prakt, etter at fagfolk hadde klart å reparere runesteinen.

• LES OGSÅ: Meiner slikt skjer for ofte
• LES OGSÅ: - Runesteinen bør vere på Stedje