Asylmottaket skal etter planen opne alt i august, og UDI har infomert leiinga i Årdal kommune om saka.
– Vi kjem tilbake med meir informasjon rundt dette og datoar for informasjonsmøte med UDI og Hero, opplyser Årdal kommune på heimesida.
Regionsjef Bente Dalåker i Hero seier at dei er glade for at dei vann UDI si tevling om etablering av nye asylplassar på Vestlandet.
Blir fordelt rundt i kommunen
– Dette blir spennande. Vi gler oss til å starte prosessen med å tilsette, setje i stand bustader og starte arbeidet, seier Dalåker til NRK.no
Ho seier at dei vann anbodet på ei desentralisert løysing.
– Det vil seie at vi skal ut på marknaden og leige bustader, då blir asylsøkjarane fordel rundt på bustader både i Øvre Årdal og på Årdalstangen. Vi skal ha kontor på Årdalstangen.
Nye arbeidsplassar
Det nye asylmottaket i Årdal vil få kring 6,5 årsverk og stillingane vil bli utlyst lokalt denne veka.
– Det UDI har sagt er at dei ventar ein oppstart 1. august. Vi held oss til det tidspunktet for at vi skal vere på plass frå den dagen. Då går vi gang med rigging av husvære og gjere det klart for å ta imot asylsøkjarane.
Sa nei i Nordfjord
I samband med at UDI hadde lyst ut nye plassar for asylsøkjarar på Vestlandet, ønskte også Norsk Folkehjelp å gje inn tilbod.
Men deira løysing med mottak i Innvik og Loen vekte så sterke reaksjonar at dei valde å ikkje gå vidare med planane.