E39 var lenge stengd ved avkøyringa til fylkesveg 569 i Romarheimsdalen etter ei dødsulukke natt til måndag. Politiet stadfestar no at ein mann omkom i ulukka.
Litt over klokka 08.00 melder Statens vegvesen at vegen er opna.
Av omsyn til pårørande ønskjer politiet ikkje å seie noko meir om den omkomne mannen enno.
USIKKER ÅRSAK: Ein veit førebels ikkje årsaka til ulukka, men politiet stadfestar at i tillegg til dei to involverte bilane og den omkomne, så var det også ein daud hjort i området.
Foto: Eivind Pettersen / NRKFekk melding i natt
To bilar var involvert i ulukka. Politiet fekk melding Klokka 0230 om at det hadde vore ei trafikkulukke på E39 på Romarheim, hovudvegen mellom Bergen og Sogn og Fjordane.
–Den eine stod i vegbana, den andre låg utanfor. Det var forbipasserande som melde frå dette til oss. Politi og ambulanse blei send til staden, og vi fekk etter kvart stadfesta at den eine personen som var involvert i ulukka var omkomen, opplyser operasjonsleiar Terje Magnussen til NRK.
Ulukkesgruppa på staden
Magnussen opplyser at politiet gjer undersøkingar på staden no i morgontimane.
– Statens vegvesen si ulukkesgruppe er også på staden no og jobbar. Vi ønskjer ikkje å seie noko om den omkomne personen. Vi jobbar opp imot varsling av pårørande, seier operasjonsleiaren ved Hordaland politidistrikt.
Fann daud hjort ved bilane
Ein veit førebels ikkje årsaka til ulukka, men politiet stadfestar at i tillegg til dei to involverte bilane og den omkomne, så var det også ein daud hjort i området.
– Hjorten låg om lag 50 meter frå bilane, men vi veit førebels ikkje om hjorten kan ha vore ein medverkande årsak til ulukka, seier Magnussen.
