No er det endeleg bestemt - om to år skal dei sterkaste i Europa måle krefter på norsk jord

– No er vi veldig, veldig glade, jublar Stian Grimseth i arrangørkomiteen på telefon frå Tel Aviv.

Der fekk han i ettermiddagen beskjeden han og mange andre har venta ei stund på. Det europeiske vektløftarforbundet har gitt sitt endelege ja, Norge og Sunnfjord skal arrangere EM i vektløfting våren om to år.

Norge har arrangert EM i vektløfting ein gong tidlegare, det var i Stavanger i 1996.

– Vi har følt at mykje var på plass, men det er svært godt å få det endeleg stadfesta, seier Grimseth.

Ventar fleire hundre deltakarar

For snart eitt år sidan avslørte Tambarskjelvar idrettslag at dei hadde store ambisjonar. Etter at dei arrangerte NM i vektløfting i 2012 hadde dei fått blod på tann, no ville dei ha eit langt større arrangement til regionen.

Sidan har det blitt jobba på mange frontar for å leggje til rette for eit EM i Sunnfjord. Eit slikt stemne betyr løftarar frå over tretti land og fleire hundre deltakarar.

Allereie i fjor november vart Norge og Tambarskjelvar tildelt EM i vektløfting, men føresetnaden var at arrangørane fekk på plass ein TV-avtale og finansiering av den.

• LES OGSÅ: Norge og Sunnfjord får EM i vektløfting i 2016
• LES OGSÅ: Har allereie imponert visepresidenten

(Artikkelen held fram under)

Kabalen gjekk opp i tolvte time

Stian Grimseth, ein av Norges mest kjente vektløftarar gjennom tidene, har stått i spissen for arrangementet. Dei siste vekene har han og dei andre arrangørane jobba intenst for å få finansieringa og TV-produksjonen i boks.

Så seint som i går løyvde fylkesutvalet i Sogn og Fjordane 1, 1 million kroner til arrangementet, og arrangørane kunne då endeleg sjå at kabalen gjekk opp.

• LES OGSÅ: No kan han juble over millionstøtte frå fylket

Dei gode nyheitene fekk Grimseth sjølv presentere for styret i det europeiske vektløftarforbundet på møtet i ettermiddag.

– Eg gjekk gjennom status, og fortalde om avtalen vi har fått i stand med TV2 om tv-sendingar og støtta vi får frå fylkeskommunen. Vi fekk veldig gode tilbakemeldingar, og dei synest vi har jobba bra, seier Grimseth.

– Ein opptur for norsk vektløfting

Og så bra har arrangørane i Sunnfjord lagt til rette, at det europeiske forbundet samrøystes gav det grøne lyset – EM i 2016 skal gå av stabelen mellom fjord og fjell i Sunnfjord.

Grimseth er overtydd om at dette vil vere eit enormt løft for norsk vektløfting.

– Eg trur heilt klart at dette blir ein opptur for breidda i norsk vektløfting. Både i Sogn og Fjordane og elles i landet, jublar han.

• LES OGSÅ: – Eg blir nesten som ein far for mange av ungdomane, både på godt og vondt

– Vil vere ei motivasjon

Sunnfjordingen har sjølv delteke på EM på norsk jord, det skjedde i Stavanger i 1996.

– Eg hugsar då Norge var tildelt EM i Stavanger i 1993–1994. Det var ein utruleg motivasjon for meg og dei andre norske utøvarane. Vi jobba ekstra for å prestere fram mot EM på heimebane, fortel Grimseth.

Sjølv vart han europameister på heimebane, og no håpar Grimseth at andre norske vektløftarane kan få oppleve det same.

• LES OGSÅ: Reiser til Tallinn for å selje inn EM-søknaden
• LES OGSÅ: Ti år sidan Stian Grimseth deltok i OL - no satsar nye talent på OL-deltaking

Trur fleire lokale kan hevde seg

Han seier det allereie er fleire lokale utøvarar i Sogn og Fjordane som ligg godt an for å kvalifisere seg til meisterskapen. Unge utøvarar som Vebjørn Varlid og Sindre Rørstadbotnen er to av dei.

– Eg meiner det er mange som har moglegheita til å prestere bra på EM i Sunnfjord om to år. Både gutar og jenter, frå vår region og landet elles, seier Grimseth.

– No er det opp til kvar enkelt, forbundet, klubbane og trenarane å jobbe saman for å få dette til.

EM i vektløfting skal arrangerast 2. – 8. mai 2016.