Senterpartiet er tradisjonelt sterke i Sogn og Fjordane, og har sidan 1991 lege mellom 20 og 30 prosent. Resultatet på 33,3 i fylkestingsvalet i år, er langt over den tidlegare toppnoteringa på 29 prosent i 2007.
– Det viser at Senterpartiet har ein sterk posisjon i Sogn og Fjordane, med dyktige politikarar som har vist at dei gjer ein god jobb. Folk har tillit til at dei vil fortsetje å gjere ein god jobb for fylket, meiner stortingsrepresentant og tidlegare partileiar, Liv Signe Navarsete.
Fleire ordførarar?
I førre periode hadde Senterpartiet sju ordførarar. Fem av desse ser trygge ut per no:
- Luster-ordførar Ivar Kvalen fekk eit kjemperesultat med reint fleirtal.
- Jan Geir Solheim er nære eit reint fleirtal i Lærdal
- I Jølster er Oddmund Klakegg meir eller mindre garantert fire nye år med 46,2 prosent og eit formalisert samarbeid med SV som sikrar fleirtal.
- Hallvard Oppedal har sikra seg nok stemmer til at ordførarposisjonen i Gulen verkar trygg.
- I bastionen Gloppen føler Leidulf Gloppestad seg klar for å ta over jobben etter partifelle Anders Ryssdal etter eit svært godt valresultat.
I Bremanger ligg partiet an til å tape makta til Arbeidarpartiet, medan situasjonen i Hornindal er uklar før forhandlingane er gjennomførte.
- Les også:
- Les også:
Så kva kommunar kan Senterpartiet vinne? Det kan bli langt fleire enn dei to som er trua i Bremanger og Hornindal.
- Solund verkar trygg. Blant dei tre største partia i Solund er det berre Senterpartiet som har signaIisert at dei har ein ordførarkandidat, og Sp vart det største partiet.
- I Årdal gjorde Senterpartiet eit brakval, og stod for ein av dei største valskrellane i landet. Aleksander Øren Heen kan bli historisk når han tek makta frå Ap.
- Både i Fjaler og Selje har partiet tru på å få ordføraren. I Gaular skal dei i forhandlingar med Ap i dag, og dei er del av forhandlingane i Hyllestad, og har gjort eit svært godt val i Balestrand.
-
– Det vert skrive historie
Med fem siitjande ordførarar nesten garanterte fire nye år og Solund meir eller mindre i boks, kan Senterpartiet ende opp med om lag 10 ordførarar, kanskje fleire, dersom forhandlingane dei komande dagane gir maksimal utteljing.
– Eg gler meg og kan nesten ikkje tru det er sant, når resultata tikkar inn frå kommunane i indre Sogn og elles rundt i fylket. Det er historie som vert skriven, seier Liv Signe Navarsete.
Spesielt imponert er ho over innsatsen i indre Sogn: Lærdal, Luster og Årdal.
– Eg har følgd Ivar Kvalen i Luster, Aleksander Øren Heen i Årdal og Jan Geir Solheim i min eigen heimkommune Lærdal, gjennom mange år. Dei greier å vere ordførarar for alle samstundes som dei er Senterparti-ordførarar og fører Senterparti-politikk. Dei står fram som fantastiske frontfigurar for flotte grupper i kommunestyra, skryt Navarsete.