Nor Tekstil har i dag eit vaskeri på 4000 kvadratmeter i Drammen. Når utvidinga er ferdig neste haust, har dei 10 000 kvadratmeter å boltre seg på.
– Dette blir landet største vaskeri. Det blir moderne og høgteknologisk. Eg vil seie det blir landets beste anlegg, seier konsernsjef Leif Gunnar Belsvik til NRK.no.
- Les meir om verksemda i
Florø-bedrifta brukar 140 millionar kroner på maskinar, utstyr og bygg. Nye kundar på det sentrale Austlandet er ei viktig årsak til dette store løftet.
– Vaskeriet vi har i Drammen i dag, har sprengt kapasitet. Vi har mellom anna fått ein stor kontrakt med ein hotellkjede, så no utvidar vi for å ta unna den veksten vi har.
Utvidar staben
Vaskeriet i Drammen har i dag 160–170 tilsette. Etter utvidingar blir det om lag 30 fleire.
– Vi aukar ikkje staben så mykje, for ein del arbeidsoperasjonar blir automatiserte med det nye anlegget.
– Kva gjer at de kan ta eit slikt løft no?
– Vi har hatt eit ønskje å utvide verksemda vår. Dei siste åra har vi fått mange nye kundar. Vi har lykkast i marknaden og no eit grunnlaget for å byggje eit større vaskeri i Drammen.
Er i ein tøff marknad
Belsvik trur ei viktig årsak til mange nye kundar er at dei følgjer med på den teknologiske utviklinga.
– Kundane set pris på at vi moderniserer oss. Det er ein tøff marknad med stor konkurranse. Vi må vere gode på energibruk, miljø og logistikk-kostnader.
Nor Tekstil har dei tre åra bygd nye anlegg både i Bergen, Bodø og Kristiansand.
– Den store utvidinga i Drammen blir den fjerde i rekka og vi gler oss til det står ferdig, seier han.
Held fram i Florø
Nor Tekstil har i dag 20 vaskeri i Norge. Bedrifta vaskar for hotell, sjukehus, industri- og servicebedrifter. Til saman jobbar 800 personar i verksemda og dei har ein omsetnad på over 800 millionar kroner.
Hovudkontor ligg i Florø og det har dei tenkt å halde fram med.
– Vår verksemd spinnar ut frå Vestland med eigarar i Bergen og Florø. Vi har ei stabil konsernleiing og har gode folk med oss. Det er ingen ulempe å halde til i Florø, tvert imot.