– Dei har hatt litt å gjere på, for brannen blussa opp att fleire stadar, og det var god temperatur i bakken, seier Espen Rysjedal ved Brannalarmsentralen i Florø.
Det var i 13-tida måndag at det vart meldt om brann i Njøsadalen i Leikanger kommune.
Først klokka 18.20 vart det meldt om at brannmannskapa hadde kontroll på flammane, som spreidde seg raskt i gras og lyng. Sidan har det pågått ettersløkking i området.
- LES OGSÅ:
Kjenner ikkje brannårsaka
– Dei har hatt god kontroll med piskar og vatn, seier Rysjedal.
Likevel har det vore fleire tilfelle i løpet av natta der brannen har blussa opp.
– Det er såpass høg temperatur i bakken der det har brunne, at det skal lite til, sidan det er så turt som det er, seier Rysjedal.
Ein kjenner framleis ikkje til kva som førte til at det tok til å brenne.
– Det er det for tidleg å seie noko om, og det er uansett noko politiet lyt svare på, seier Rysjedal.
Det er heller ikkje klart kort stort område som har vorte skadd i brannen.
– Eg har ikkje fått noko eksakt tal på kor stort område som er råka av brannen, seier Rysjedal.
(Artikkelen held fram under videoen)
- LES OGSÅ:
Skal ha gjennomgang klokka ni
Men han understrekar at det er snakk om eit monaleg område.
– Det er eit stort område det er snakk om, men det er bratt terreng der inne, så det er eit krevjande område å få fram vatn i og mykje utlegging av slangar, seier Rysjedal.
Store styrkar med brannmannskap frå både Leikanger og Sogndal har jobba på staden. I tillegg har rundt 20 personar frå Sivilforsvaret bidrege i kampen mot flammane.
Kor lenge ettersløkkinga kjem til å vare, er vanskeleg å tidfeste.
– Klokka ni skal brannvesenet ha ein gjennomgang med brannsjefen i Sogn IKS, og då skal det gjerast ei ny vurdering. Men eg reknar med at dei vert verande på staden utover dagen, seier Rysjedal.