Bønder kvir seg til sommaren

– Eg orkar ikkje å tenkje på kva som skjer til sommaren, seier sauebonde Arne Rebni Øvreås i Skjolden.

• Les også: Krev større uttak for å bli kvitt jerveproblema

Jakta intenst i vinter

Det har vore ei intens jakt på jerv i dei indre delane av Sogn. I fjor tok rovdyret 850 sauer og lam på beite, og bøndene fryktar at det vert ein like utfordrande sommar.

– Ja, jerven må vekk elles vert det eit blodbad til sommaren, seier han.

Sauebonden meiner Miljødirektoratet, som deler ut fellingsløyve på rovvilt, burde delt ut fleire fellingsløyve.

– Det er minst ti jerv i området her, og direktoratet har berre delt ut eit fellingsløyve. Vi er ikkje særleg optimistiske med tanke på at vi får vekk jerven.

Avviser kritikken frå bonden

Men direktoratet avviser blankt kritikken og hevdar dei har god dialog med Statens naturoppsyn, SNO, som har ansvaret for å ta ut dyret.

– Vi har delt ut eit fellingsløyve, og har tett dialog med SNO om dette. Dei har vore ute på jakt i to rundar i vinter, og vi har god oversikt over dette, seier seksjonssjef for Vilt, Terje Bø.

• Les også: Enorme rovdyrtap: - Verste dyretragedia nokon sinne

Treng ikkje fleire enn eit løyve

Også rovviltforvaltar i Sogn og Fjordane, Rein Arne Golf, meiner det er lett å få felt fleire dyr om det trengst.

– Vi held dialogen med direktoratet og melder inn behova for felling til dei. Dei tek avgjersla, og vi utfører jobben, seier Golf.

Men å bli kvitt jerven for godt, om dei skulle klare å finne den, er ikkje mogleg.

– Så lenge det er jerv i fjella våre, er det ikkje mogleg å fjerne den heilt, seier rovviltforvaltaren.

Det er observert jervespor og SNO har vore ute for å prøve å felle, utan hell.

– Det har vore ein utfordrande vinter og vanskelege vêrforhold. Dermed har det ikkje vore mogleg å skyte dyr, forklarer Golf.

– Eg håpar jerven vert teken. For vi kan ikkje oppleve det vi opplevde i fjor sommar, seier den fortvila sauebonden i Skjolden.

• Les også: Kan ha mist mellom 60 og 90 lam