Tok storeslem i blome-dekorering

Dekoratørar frå Fjaler-verksemda stakk av med både første, andre og tredjeplassen då blomar i alle former og fasongar vart traktert etter beste evne.

To av dekoratørarane besøkte måndag ettermiddag NRK Sogn og Fjordane sitt radiostudio.

Marianne Sunde vart vinnar av konkurransen og Anne Overdevest kom på 2. plass.

– Eg vart veldig overraska, men glad, seier Marianne Sunde som tok førsteplass med dekorasjonen forma som eit egg av påskeliljer og såkalla pusekattar eller gåsungar.

–Du må øve og vere interessert og lage eit bra arbeid. Det seier ho litt beskjedent.

Saman med kollega Anne Overdevest som tok andreplassen i blometevlinga, fyllte Sunde NRK sitt K1-studio med blomar. Heile rommet vart etter kvart dekorert med nyansar av gule påskeblomar.

Anne Overdevest er stolt over eigen innsats, og er nøgd med andreplassen.

– Eg synest det var kjempekjekt. Veldig uventa, men supergøy, seier dekoratøren som til dagleg dekorerer blomar på Dale Sentert.

Etter å ha vunne distriktsmeisterskapen tek damene turen vidare til noregsmeisterskapen i Tromsø i november.