Dei to uhella den 26. februar og 16. mars er svært like. I begge tilfella har bilane fått høgre hjulparet utanfor ein langsgåande asfaltkant. I begge tilfella har sjåføren ratta litt for hardt til venstre for å kome over kanten, og i begge tilfella har det resultert i at dei miste kontrollen, bilane har «snurra» i vegbana og hamna i tunnelveggen.
– Vi gjer oss våre tankar om årsakssamanhengar, og vi vil ikkje utelukke at den langsgåande asfaltkanten i tunnelen kan vere ei medverkande årsak, seier politiførstebetjent Arnt Olav Aas til avisa Ytre Sogn.
- LES OGSÅ:
Ekstra asfaltkant
Då NCC la ny asfalt på fv 55 i Høyanger i fjor asfalterte dei ikkje heilt ut til den eksisterande asfaltkanten. Dermed vart det ein ekstra asfaltkant eit lite stykke inne i vegbana. Det er denne kanten dei to bilane har kome utanfor.
NCC har vedgått at asfaltlegginga sist haust ikkje er i samsvar med den kontrakten selskapet hadde med Statens vegvesen.
I tillegg til den ekstra asfaltkanten inne i Kvernhaugtunnelen handlar det om ein skarp kant ved avkøyringa til Høyanger sentrum.
- LES OGSÅ:
Overingeniør Jan Bremer Remø i Statens vegvesen seier til avisa dei ikkje kan slå fast at asfaltkanten er skuld i uhella i tunnelen, men at dei heller ikkje kan utelukke at det er ein samanheng.
– Difor har vi sett opp fareskilta «Annan fare» og «Langsgåande asfaltkant» utanfor begge tunnelmunningane.
Det var ikkje alvorleg personskade i dei to trafikkuhella.