Meiner Ap må ta opp gruvesaka på ny

For no syner ei spørjegransking at fleirtalet av veljarane til partiet rundt Førdefjorden er mot gruveplanane. Det same er lokallaget i Førde.

• LES OGSÅ: Folket rundt fjorden vil ikkje ha gruvedrift

Dette må fylkespartiet ta innover seg, meiner Gjertsen.

– Veljarane våre er på linje med den motstanden vi har signalisert gjennom vårt program og dei vedtaka vi har vore med på i Førde kommune.

Lokallaget i Førde har vore åleine i Arbeidarpartiet med sin motstand mot gruveplanane i Naustdal. Men ei undersøking Norstat har gjort for NRK syner at ikkje berre er 61 prosent av innbyggjarane rundt Førdefjorden mot. 61 prosent av Ap sine veljarar er også motstandarar.

– Det viser berre at dei som er nærmast er dei som er mest imot. Rundt om i fylket har dei ikkje den nærleiken til saka som vi har og blir ikkje berørte på same måten.

• LES OGSÅ: Han meiner Arbeidarpartiet gøymer seg i deponisaka
• LES OGSÅ: Høg temperatur og harde ord i debatten om gruvedrift i Vevring
• LES OGSÅ: Meiner den lange ventetida på gruve-avgjerd er ein politisk skandale

– Litt lettvint behandling

For fylkespartiet har heile tida vore for gruvedrift. Ordførarkandidaten i Førde meiner dei no må ta inn over seg folkemeininga.

– Eg synest fylkespartiet hadde litt lettvint behandling då dei vedtok sine resolusjonar, men det er mi personlege meining. Det har vist seg at med dei rapportane som har kome og den usemja som har vore sidan så burde kanskje føre var-prinsippet ha telt meir.

Trur saka kjem opp på årsmøtet

Fylkesleiar Hilmar Høl seier eit nytt fylkesårsmøte kan snu deira standpunkt.

– Vi respekterer at vi har ei nei-side i partiet, og at dei truleg vil prøve seg igjen. Når partiet har årsmøte i mars 2015 kjem nok denne saka til å bli drøfta.

– Trur du fylkespartiet vil snu i saka?

– Det er berre eit fleirtal på årsmøtet som kan gjere det. Men dersom signala er slik at våre veljarar står for ein stor del av nei-sida reknar eg med at saka blir teken oppatt.