Hopp til innhold

Får 500.000 kroner for å få ungdomen sprekare

Fylkeskommunen gir 500.000 kroner til Sogn og Fjordane turlag sitt friluftsprosjekt for ungdom. For å markere tok miljøvernministeren ein padletur i Jølstraelva.

Bård Vegard Solhjell padlar i Jølstra

Ministeren padlar i Jølstra

– Å få desse pengane er rett og slett utruleg bra. Dette legg til rette for meir frivillig aktivitet, seier fylkesleiar i Det norske turlag, Marino Ask.

Fylkeskommunen har vedteke å gi Sogn og Fjordane turlag 500.000 kroner i prosjektstøtte. Pengane skal brukast til å motivere ungdom til å kome seg ut i naturen. Sogn og Fjordane turlag og fylkeskommunen har inngått ein utviklingsavtale for å styrke frilufystilbode til born og ynge i fylket.

Miljøvernministeren testa friluftslivet.

For å markere den nye avtalen tok miljøvernministeren turen ut på Jølstraelva for å prøve seg på kajakkpadling.

– Friluftsliv er jo utruleg effektiv veg til aktivitet og betre helse. I tillegg er det jo fantastisk moro, seier ein padleklar miljøvernminister.

(Artikkelen held fram under biletet)

Solhjellkajakk

KLAR TIL PADLING: Miljøvernminster Bård Vegar Solhjell får på seg våtdrakt før han skal padle i kajakk på Jølstraelva.

Foto: Kjellrun Lavik/NRK

Vill Vestlandsnatur

Prosjektet «Ung meistring i vill Veslandsnatur», skal vere med å bygge opp aktivitetstilbod som er retta mot å få ungdom ut i naturen.

I Sogn og Fjordane turlag er det berre éi administrativ stilling, elles er det frivillig arbeid som gjeld. Etter planen skal turlaget satse på friluftsaktivitetar som ski, fjellturar, kajakkpadling, klatring, breturar, kiting og mykje anna.

Leiar i Det norske turlag Ung i Luster, Stig Øystein Schmidt seier desse pengane er viktig for ungdomen i fylket.

– Dette er utruleg bra for oss, no kan vi satse meir på aktivitetar for ungdomen, seier Schmidt.

– Er ikkje ungdom i Sogn og Fjordane aktive nok?

– Det er mange som ikkje er det. Desse ungdomane vil vi hjelpe til å kome seg ut i naturen, seier Schmidt.