Spørsmålet var tema på eit møte mellom Statens vegvesen og Norled i dag.
– Vi har konkludert med at Norled skal levere det dei har tilbydd på sambandet. Ergo er ikkje Ullensvang ei av ferjene som skal gå på sambandet Lavik-Oppedal, seier Anders Sæternes i Statens vegvesen.
Då Norled vann anbodet på Lavik-Oppedal i konkurranse med Fjord1, var kontrakten at ei av ferjene skal vere driven elektrisk. Dei andre skal vere katamaranferja «Stavanger», bygd i 2003 og ferja «Tidesund» , bygd i 2008.
- LES OGSÅ: Omstridd ferje kjem til Hareid
- LES OGSÅ: Frp mot Frp i ferjestrid
Gir opp bytte
Men Norled meiner Ullensvang ville fungere betre i Sogn enn på sambandet Sulesund-Hareid. Selskapet har difor bede vegvesenet om å få byte ferjer: «Ullensvang» til Lavik-Oppedal og «Tidesund» på Hareid-Sulesund som før.
Motstanden mot at Ullensvang skal trafikkere Sulafjorden har vore svært stor i Møre og Romsdal.
Etter avgjerda i dag, ser Norled seg ferdige med saka, og kjem ikkje til å ta nye initiativ til å endre dette no.
- LES OGSÅ: Ingen vil ha denne ferja
– Kan ikkje bytte til noko dårlegare
Samferdsleminister Ketil Solvik-Olsen har tidlegare formulert seg i retning av at eit byte av ferjer kunne vere greitt, dersom partane var samde om det.
Men Statens vegvesen er i dag heilt klare på at saka er avgjort.
– Du må levere etter kontrakten. Eit eventuelt bytte i ein allereie inngått kontrakt må vere like godt som det du skal bytte til. Du kan ikkje bytte til noko som er vesentleg dårlegare enn det som opphavleg låg inne i tilbodet, seier Sæternes.
– Ville det vore tilfelle om Norled hadde fått bytta her?
– Heilt klart, seier han.