– Det var heilt fantastisk å få besøk av kunnskapsministeren som snakka om korleis ein skal få fleire lærlingplassar, seier Hossein Akbari som er lærling i Skanska og som er i fullt arbeid på Eikefjord skule.
I dag vitja kunnskapsminister Torbjørn Røe Isaksen fleire skular i Sogn og Fjordane. Akbari er heldig som har fått seg lærlingjobb. I Sogn og Fjordane og Hordaland står nesten 130 ungdommar utan lærlingplass.
– Fleire må ta fagbrev
Kunnskapsministeren meiner samfunnet treng fleire fagarbeidarar i framtida.
– Undersøkingar Statistisk sentralbyrå har gjort viser at dersom ikkje fleire tar fagbrev vil vi mangle 90 000 fagarbeidarar i 2030. Det er innanfor privat og offentleg. Skal vi få dette til må fleire ta yrkesfagleg studieretning, og vi må få lærlingplassar.
- Les også:
– Vi kan ikkje tvinge bedriftene til å ta imot lærlingar. Dei tar inn lærlingar fordi dei vil bidra til å rekrutter arbeidskraft dei kan ha nytte av i framtida. Det er heilt avgjerande.
Ministeren lét seg imponere over skulebygget som er i ferd med å reise seg i Eikefjorden. No ønskjer han at fleire skal få delta i slikt arbeid – ved å auke prestisjen ved å vere lærlingbedrift.
Lanserer ny merkeordning
– Det nye er at i november i år lanserer vi ei merkeordning for lærlingordninga. Vi håpar bedriftene skal bruke dette for å vise at dei tar ordninga på alvor og at dei er ei lærlingbedrift. Vi veit jo at læringbedrifter tar samfunnsansvar, sa Røe Isaksen.
- Les også:
Både Flora kommune og Skanska fekk merket som viser at dei er ei lærlingbedrift overrekt av kunnskapsministeren.
Kunnskapsminister Torbjørn Røe Isaksen besøkte også Halbrend skule, Flora ungdomsskule og ingeniørutdanninga i Florø.
For Hossein Akbari var møtet med ministeren og hans lovnadar godt nytt.
– Det var veldig, veldig bra.