Prosjækta bidumsáme bájkenamáj birra almoduváj bierjjedagá gå vuosádus Bájddárin rabáduváj. Vuosádus mij ij dåssju namájt åvddånbuktá, valla aj mij vuoset dájddakártav bidumsáme bájkenamáj.
Ja nav la de vejulasj lagábuv oahpásmuvvat daj bájkenamáj, ja dájna prosjevtajn.
Riek ávon
Bjørn Ove Berntsen la prosjevtav álgo rájes tjuovvum, ja sån la riek ávon gå dal vijmak dåhkki namájt bidumsámegiellaj kártan vuojnnet.
– Geldulasj la de gæhttjat ja diehtet sáme bájkenamá li dánna Bájddárin. Dási lav mån ávvudallam ja vuorddám.
Bjørn-Ove Berntsen gæhttjá dajddakártav gånnå bidumsáme bajkkenammaprosjækta l vuodon. Berntsen la dudálasj gå vijmak dahkkár kártta l almoduvvam, ja sån dal diedon kártav galggá adnuj válldet.
– Vuojnáv moadda fijnna gåvå kártan, ja de la aj hávsske namá lij bidumsámegiellaj. Ja duodden lij aj moadda symbåvlå ja gåvå.
Ávkke giela hárráj
Bidumsábmelasj Svieriga bieles Elsy Rankvist vuojnná ávkev dájna prosjevtajn, sierraláhkáj gå dat guosská gielav mij la vargga gáhtomin.
– Iv la mån gæhttjam gájka bágojt, valla dav majt lav vuojnnám la riek buorak. Ja aj dan diehti gå bidumsáme giella galggá gullut, ja aj vuojnnusij boahtet.
Gehtja aj:
Moadda tjuohte namá
Da la julevsáme guovdásj Árran mij la dáv prosjevtav jådedam, ja prosjæktajådediddje Line Merethe Skarvik la dájna juo niellja jage barggam. Vuostasj jage mannin åtsåtjit ja registrerit bidumsáme bájkenamájt.
– Dajna lip de badjelasj 200 namá gávnnam. Maŋemus oasse dássta la gávnnat vuogev gåktu dájt namájt tjalmostit ja vuojnnusij biedjat. Ja dajna l dát vuosádus mij uddni rabáduváj buorre vuohke.
Dát prosjevtas tjuovvu de vuosádus, dájddakartta mij la Hans Ragnar Mathisenis dagádum, ja duodden aj girjje mij de gæssáj almoduvvá. Girjen li tjállusa ma li tjanádum bájkenamájda bidumsáme guovlon.
Tjoahkkáj lij dajna sulle 500 bidumsáme bájkenamá registreridum, ja maññenagi dal dá namá almmulasj kártajda båhti.