Maŋŋil go Inga Juuso eretvádjolii 2014 čavčča, de lea Romssa fylkkajuoigivirgi bisson guorosin gitta 2016 ođđajagimánu rádjai. Dalle álggii Ulla Pirttijärvi-Länsman Romssa fylkka ođđa fylkkajuoigin.
Ulla Pirttijärvi-Länsman lea juoigi ja musihkkár, ja son lea leamaš Suoma bealde Lappi leanadáiddár 2004 rájes gitta 2007 loahpa rádjai. Son lea riegádan ja bajásšadan Áŋŋelis Suoma beal Sámis jagi 1971.
Skuvlakonsearttat
Dáiddalaš doaimma oktavuođas oaččui Ulla Pirttijärvi-Länsman jagi 1996 Sámiráđi gudnebálkkašumi «Hong-Kong dohkká»-girjji ovddas. Son lea leamaš mielde musihkkajoavkkuin, ja nu sus lea nana musihkkaduogáš.
– Fylkkajuoigi virggis leat ollu gelddolaš doaimmat mat geasuhit, nugo mat skuvllaid mielde johtit gos beassá deaivvadit ollu nuoraiguin, dadjá Pirttijärvi-Länsman.
Son lea Harstad-gávpogis mátkkoštan sámi álbmotbeaivvi doaluid oktavuođas, ja lea ovttas Harald Skullerudain ja Frode Fjellheiman doallan skuvlakonsearttaid.
Máŋggalágan doalut
Fylkkajuoigis leat máŋga ja iešguđetlágan doalut, ja son lea mielde guoimmuheamen sihke mánáid ja nuoraid iešguđetlágan doaluin mánáidgárddiin ja skuvllain.
Ulla Pirttijärvi-Länsman dadjá ahte son maiddái beassá lágidit konsearttaid iežas musihkkáriiguin, ja lohká leat ilus go ná beassá leat mielde ovddideamen ja eanet oainnusindahkat sámi musihka ja sámi kultuvrra.
Guldal Ulla Pirttijärvi Länsman: