Juohke stálugilvvut-prográmmas guokte roahkkadis máná lávkeba stálumáilbmái, gos galgaba veahkkálagaid gilvaladdat stálu vuostá. Stállu lea ordnen gilvvuid danne vai oččošii mánáid iežas sehkkii, muhto mánát jáhkket ahte sii sáhttet vuoitit fiinna juovlaskeaŋkkaid jos vuitet stálu. 12 prográmma áigge 24 máná gilvaladdet stáluin ja oaidnit leaš, gártágo oktage stálu sehkkii.
Sámi máidnasiid vuođul ráhkaduvvon
Stálugilvvut -prográmmaráidu vuođđuduvvá sámi máidnasiidda. Máŋgasat leat sihkkarit gullan muitalusaid ja máidnasiid stálu birra ja mot mánát galggašedje láhttet juovllaid áigge.
Mánáide lávejit muitalit ahte ovdal juovlaruohta ferte šillju čorgejuvvot amas stáluráidu darvánit smáhkuide ja rissiide. Jos stáluráidu darvána masage, de ferte leat čáhci spánjas vai stállu beassá čáziin jáddadit goikkus iige dárbbaš vara šlubistit. Juovllaid áigge mánát galget leat maiddái siivot eaige oaččo rigeret amas stállu boahtit ja dohppet mielde. Juovllaid áigge ii galggaše čierastit amas čierastit stálu sehkkii. Stálluhan ballá čuovggas ja danne johtá beare sevdnjes áigge.
Mánát ja stállu gilvaladdet
Gilvvut, main mánát gilvaladdet, leat čorgen, čáhci, nohkkan, čierasteapmi ja dolla. Mánát ja stállu gilvaladdet juohke prográmma áigge golmma iešguđet gilvvus. Juohke prográmmas guokte máná gilvaladdaba stálu vuostá. Gilvaleaddjit sáhttet vuoitit stálu dehe gártat stálu sehkkii
Stálugilvvut -prográmmat sáddejuvvojit NRK Superis 17. - 19.12 ja 23. - 31.12 diibmu 17.00.
Jos ii háhppet geahččat prográmmaid TV:s, de prográmmaid sáhttá maiddái geahččat .
