Lea leamaš galbma giđđa ja unnán njuvččat leat ollen davimus guovlluide, muhto dál leat máŋgalogi njuvčča seivon láddui mii lea ovdalaš boandda Magnus Varsi giettis Sirpmás Deanus.
Diet ii leat gal dábálaš, ahte nie olu njuvččat seivot, muitala Varsi.
Video ja jearahallama Magnus Varsiin oainnát go deaddelat váldogova.
Laskan ja hárjánan olbmuide
– Nuppelot jagi áigi bohte moadde njuvčča vulogeahčái gietti, ja dat eai boahtán olbmuid lahka. Mu mielas orru nu ahte njuvččat leat nu laskan, ja dat leat maid hárjánan olbmuid oaidnit. Ovdal lean oaidnán dušše moadde pára, muhto dás leat dál 11 pára, 22 njuvčča oktiibuot.
Njuvččat leatge lassánan Norggas maŋemus 40 jagi. Ovdal ledje njuvččat hárvenaš meahccelottit mat measta dušše davimus Norggas monnejedje, muhto dál dat monnejit measta buot fylkkain Norggas, čállá Miljølære neahttasiidu.
Magnus Varsi muitala ahte son láve váccašit lahka ja hupmat maid njuvččaide, mat eai ballá gal dainna.
– Mun láven muhtomin viggat háleštit, dat gehččet gal, muhto eai girdil. In guhká gal sáhte, go ferten dego dápmat daid veahá, vai dat hárjánit munnje. In háleš daiguin dávjá iige guhká.
Magnus Varsi
Foto: Nils Henrik Måsø / NRKGiktalanrituála
Varsi muitala njuvččaid gavvit suoidne- ja rásseruohttasiid láddos.
– Diekko gokko lottit leat dál, dakko lávejit beanamárkanat ja dies lávejit beatnagat vuoiŋŋastit ovdalgo viidáset vulget. Dasa leat báhcán hálbmamoalut mat leat luvvan, ja jáhkán ahte dat boibmot daid maid.
Njuvččat lávejit su giettis miessemánu álgui, dassážii go suddagoahtá muohta duoddaris ja johkii šaddet suttit.
– De mannet sajiide gos lállet ja mannejit. Mu mielas orru dain dál veahá dakkár giktalanrituála dás, go dat almmái viggá dan skihpára veahá movttiidahttit, muitalastá vel Magnus Varsi Sirpmás.
