Leaŋgáviika, Doasku, Ránáid ja Divrráid suohkanat ohcet dohkkehuvvot Sámedikki ealáhusovdáneami doarjjaortnegii, mii mearkkaša ahte dáid suohkaniid fitnodagat sáhttet ohcat doarjaga ealáhusovdáneapmái. Divrráid suohkana sátnejođiheaddji, Marit Alvig Espenes, mieđiha ahte suohkan gal ii leat dán rádjai bearehaga deattuhan sámevuođa, ja lasiha ahte ii leat ge gal dušše ruhtá mii geasuha.
Suohkaniid lohku lassána
Dálá sámi ealáhusovdáneami doarjjaortnet lea Sámedikki doarjjaortnet, mii ásahuvvui jagi 1976. Dalle ledje dušše 5 Finnmárkku suohkana mat gulle dán ortnega vuollái, namalassii Unjárgga, Deanu, Kárášjoga ja Porsáŋggu gielddat ja Guovdageainnu suohkan. Doaibmaguovlu lea dađistaga lassánan.
Jagi 2012 serve vihtta romssa beale suohkanat Ráissa, Skiervvá, Gálssa, Báhcavuona ja Siellat suohkanat, ja dalle ledje oktiibuot 31 suohkana mat gulle sámi ealáhusovdáneami doarjjaortnegii doaibmaguvlui.
Dál leat 4 ođđa suohkana ohcan dohkkehuvvot doaibmaguvlui, namalassii Leaŋgáviika, Doasku, Ránáid ja Divrráid suohkanat. Lassin dáid suohkaniidda leat Davvinjárga ja Davvisiida ohcan olles suohkana dohkkehuvvot doaibmaguvlui, dálá ektui go oassi suohkanis gullet dán doarjjaortnega guvlui.
Lasáhussan suohkana ealáhusfondii
Divrráid suohkana sátnejođiheaddji, Marit Alvig Espenes, dadjá ahte sámedikki doarjjaortnet šattašii buorre lasáhussan daid doarjjaortnegiidda mat sis juo leat. Son namuha earenoamážiid suohkana ealáhusfoandda ja eará váikkuhangaskaomiid, ja lasiha ahte maiddái sin ránnjásuohkanat juo leat ohcan dohkkehuvvot Sámi ealáhusovdáneami doarjjaortnega guvlui.
Dehálaš ealáhusovdaneapmái
Ášši meannuduvvui Divrráid suohkanstivrras, maŋŋil go Divrráid várresátnejođiheaddji, Stig Stokland lokte ášši gažaldahkan sátnejođiheaddjái. Son ákkastalai suohkanstivrras ahte ortnet, mii ovdal gohčoduvvui sámi ovdanahttinfoanda, lea dehálaš ealáhusovddideapmái suohkaniin, ja earenoamážiid danin go dat boahtá ávkin smávva fitnodagaide mat eai olat álggahan- ja háhkandoarjaga eará gálduin. Son ákkastalan maiddái ahte doarjjaortnegis ii čearddalašvuođa gáibidus iige dat geatnegahte suohkana.
Nannet sámevuođa
Leago dušše ruhta mii geasuha suohkana searvat, vai leago maiddái Divrráid suohkanis dáhttu nannet sámevuođa, mun jearralin sátnejođiheaddjis.
–Ii sáhte gal čiegadit ahte sin suohkanis sámevuohta ii gal leat bearehaga deattuhuvvon, muhto dál sáhttá leat vejolašvuohta bidjat sámevuođa eanet oidnosii Divrráid suohkanis, vástida sátnejođiheaddji, Marit Alvig Espenes.
Son dadjá maiddái ahte sii dieđusge ohcalit eará váikkuhangaskaomiid mat šattaše ávkkiin Divrráid suohka smávvafitnodagaide, ja dán doarjjaortnega vuoruhansuorggis leatge juste dakkár smávva ealáhusat mat sis leat. Sátnejođiheaddji Marit Alvig Espenes lohka vuordit ahte sin ohcamuš dohkkehuvvo Sámedikkis, ja sii gal áigot čájehit sámevuođa maiddái Divrráin.
Sámegiela hálddašanguvlui maiddái
Go sátnejođiheaddji nie čábbát hupmá sámi giela ja kultuvrra birra, de gal fertejin jearrat ahte áigugo son Divrráid suohkan maiddái ohcat suohkana sámegiela hálddašanguvlui, ja dasa vástida sátnejođiheaddji, Marit Alvig Espenes, ahte suohkanstivra ii leat meannudan iige cealkán maidege gažaldahkii ahte galggai go Divrráid suohkan searvat sámegiela hálddašanguvlui . Jus dakkár ášši loktejuvvo, de sii fertejit dan guorahallat, muhto jus dál gal dat ii leat áigeguovdil vástida Espenes.
Miellagiddevaš diehtun sidjiide
Iinna ja Biras Sámiid Searvvi jođiheaddji, Runar Myrnes Balto, lohka illu gullát ahte Divrráid, Leaŋgáviika, Doasku ja Siellat suohkanat áigo searvat sámi ealáhusovdáneami doarjjaortnegii.
Son dadjá ahte sámiid servviid garra ja guhkes barggu vuolggahan dákkár bohtosa, ja lohka sin searvái Divrráid suohkana mearrádus ahte searvat sámi ealáhusovdáneami doarjjaortnegii buorre skeaŋkan, go IBSS han boahtte jahkái ávvuda searvvi 40 jagi.