Ruošša bealde lea blogga šaddan eanemus luohtehahtti ođasgáldun

– Bures, mu namma lea Aleksander, ja mun gohčodan iežan Blogger51, čilge Aleksander Serebryanikov.

Ruošša bealde leatge bloggat ja sosiála mediat šaddagoahtán olbmuid deháleammos ođasgáldun.

Ollugat eai šat luohte mediaásahusaide maid eiseváldit stivrejit bienasta biitnii.

• Loga ášši dárogillii: Bloggeren Aleksander ble truet med mental sykehus

– Áite su bidjamis miellabuohccevissui

Serebryanikov ássá Murmánskkas. Son lea dál okta Davvi-Ruošša eanemus dovddus ođasbloggáriin, muhto Ruošša bealde čállit ođđasiid main eiseváldit cuiggoduvvojit ja almmuhit daid, sáhttá dagahit du bárttiid sisa.

– Mu geahččaledje sáddet sihke miellabuhcceviissui, ja giddagassii, muitala Serebryanikov.

(Ášši joatkašuvvá gova vuolábealde)

Ruošša dorvvolašvuođapolitiiját dutke su ášši guokte jagi, ja dan gaskkas ii beassan oppanassiige fitnat olggobeale Murmánskka gávpoga.

Su ledje áššáskuhttán ekstremisttalága vuođul, muhto dál lea áššehuvvon ja šaddan friddja olmmožin fas. Ášši lea čuohcan, ja ieš jáhkká eiseváldiid dáinna geahččalan su baldit čállimis.

– Mun in leat dákkára vásihan ovdal, ja dat lei balddihahtti, lohká son.

Stáhtavašálaš

Ruoššadovdi lohká Ruošša polithkalaš dili dagahit ahte stáhta atná vašalažžan buohkaid geat eai leat ovttaoaivilis stáhta almmolaš oainnuin.

–: Nugo dán bloggára, de áitet duopmostuoluide geassit áššiid. Mii leat maid oaidnán ahte áitet ja maid cábmet dakkáriid geat cuiggodit eiseváldiid, čilge Oslo universitehta dutki Jardar Østbø.

Muhto Ruošša ambassadas eai mieđit eiseváldiid loavkidit sátne- ja cealkinfriddjavuođa. Sin mielas leat dát dološ ságat mat eai heive otná dillái.

– Mii fertet juohke áššis geahččat smávimus osiid, ja juohke ovttaskas ášši sierra. Muhto oppalaččat in leat goassige gullan ahte olbmot dahje journalisttat eai beasa cealkit maid háliidit, ii ge oktage leat ráŋggáštuvvon sániidis dihte, deattuha Ruošša ambássada diehtojuohki Andrej Kulikov.

Duopmostuolut leat áššehuhttán Aleksandera, ja son ii gal áiggo heaitit čállimis. Goitge ii oainne alddis áibbas oadjebas boahtteáiggi go dilli lea nu go lea Ruoššas.

– Eiseváldit vigget doarrut min vuostá geat bajidat jienaideamet. Dát muitala munnje ahte sánit bastet buorebut go miehkit, dadjá Aleksander Serebryanikov.