– Jos lean 30 jagi dáppe, amma juo čievččastit mu olggos ovdal

– Mun nu illudan. Ja mun ferten gal vuiget – mun lean vuordán dán. Muhto in fal dan ahte dálá NRK Sámi hoavda galgá heaitit, boagusta Mona Solbakk.

NRK sáddehathoavdda, Tor Gjermund Eriksena, mielas, šaddá Solbakk nannejeaddjin.

• Loga maiddái: Gii lea Mona Solbakk?

– Áiggun nannet giela ja kultuvrra

– Son lei oktiibuot dat buoremus evttohas NRK Sámi hoavdavirgái. Jáhkán son duođas šaddá váldit ovddasfástádusa, mii lea nannet iežamet sámi servodatbarggu. Lean viehka sihkar ahte NRK Sápmi dál oažžu čeahpes jođiheaddji, dadjá Eriksen.

NRK Sámi geatnegasvuohta lea Mona Solbakk mielas čielggas.

– Mii galgat ovdánahttit ja seailluhit sámi giela ja kultuvrra, dadjá boahttevaš NRK Sámi hoavda.

– Amma juo čievččastit mu eret

Dálá NRK Sámi hoavda, Nils Johan Heatta, lea virggis leamaš 30 jagi.

NRK jearrá NRK sáddehathoavddas, Tor Gjermund Eriksenis, jáhkká go Mona Solbakk šaddá nie guhká hoavddastuolus.

Jearaldat boktá boagusteami Eriksenis.

– Gal juo dat gal lea veahá árrat dál einnostit, ovdalgo Solbakk oppa lea beassán čohkánit hoavdastullui.

– Muhto lea han gal viehka erenoamáš ahte Heatta lea 30 jagi leamaš barggus, borgemánu vuosttaš beaivve. In jáhke mii sáhttit vuordit ahte earát nie barget hoavdan.

– Jos mun lean 30 jagi dáppe, amma dal juo čievččastit mu olggos ovdal dan. Mun in leat seamma nuorra go Heatta, go son álggii, reaškkiha Mona Solbakk loahpas.