Muhtem ålmmå e Lars-Bjørnarij (23) oajvev vatte gå iesj la ålmmå

Lars-Bjørnar Knutsen le álgos Divtasvuonas, valla dálla Bjugnan, Trøndelagan årru, gånnå biesskediddjen barggá.

Ij lim goassak usjudallam galgaj biesskediddje-virggáj huvnjágit.

– Iv lim månnam navti galgaj sjaddat. Lidjiv má vuosádusáj jali musihkajn sihtat barggat.

Rádjamviehkken álgij

Ittji nagá joarkkaskåvlåv nåhkåt. Dajnas de hiejtij, ja bargov biesskediddje-viddnudagán oattjoj gånnå rádjamviehkken dåjmaj.

– NAV'as viehkev ánodiv, ja de oahppamsajev oadtjuv. Navti de álgij.

Lars-Bjørnar lij de muhtem máno sijdan tsáppám.

– Lij hávsske vat idedijt árrat smaredit, ja bargguj mannat.

Danna de diedon ienemusát rájaj, valla maŋŋenagi de vuoptajt besaj bassat, ja vuoppta-doahkoj oattjoj gillot.

– Ja de berustahttjájiv.

Hiehtedille fáhkagæhttjalimen

Lars-Bjørnar le dal badjelasj jagev fáhkaduodastusájn barggam. Valla gå fáhkagæhttjalimev galgaj tjadádit, de vargga ållu boasstot manáj.

– Dalloj lij mujna huj råhtto. Sierráláhkáj maŋemus máno.

Tjálij ja gárvedij juohkka biejve gå bargos bådij.

– Lidjiv huj gárves, valla de vigev fáhkagæhttjalimen dahkiv.

Dan iehpedájon jáhkij galgaj tjuoldástit.

– Valla de hæhttujiv tjielggit majt lidjiv boasstot dahkam, ja de huoman buoragit manáj.

Ja dassta de åhpadusájn manáj.

(Ártihkal gåvå maŋŋel joarkká)

Nissunbargguj tjanádam

Biesskediddje liehket le Lars-Bjørnara mielas nissunbargguj tjanádam. Sån hasot ietjá báhtjajt biesskediddjen barggagoahtet.

– Biesskediddjeklássan lijma dåssju gålmmå báhtja 60 oahppijs. Le gal suddo gå navti l.

Lars-Bjørnara mielas de ulmutja biesskediddjijt dagu homofijlaj aktidi.

– Vuostasj majt gullat oattjov.

Muhtema tjabu vuosteldij, ja e sidá oajvev Lars Bjørnarij vaddet.

– Navti l dille. Dasi lav hárjjánam.

Huoman de bargguj lijkku. Ienemusát dan diehti gå bæssá sjuggelisvuodav åvddånahttet.

– Juohkka biejve oattjov ietjamis vaddet. Duodden de moadda máhttelisvuoda fágan gávnnuji.

Suohtas dáhpádus

– Akti de galggiv ålmmå vuoptajt biesskedit. Sidáj sijdujt oanedit, ja de sidáj vuoptajt oajve nanna siesstet.

Biesskedam-masjijnan le dakkir skuovva-áhta, ållu åtgietjen. Dat de luovvanij jur gå biesskedahttjáj.

– Vuopta lidjin diedon ållu gáhtum, jur dan avta sajen. Dagu dábálasj mánno sjattaj. Tjuodtjuv dåssju ja gæhttjiv, majt dal dálla dagáv? Bivástuvviv, ja ittjiv diede gåsi galggiv tjiehkádit.

Gå lij dáv jallasav ålmmåj tjielggim, de ittji åvvå berusta.

– Jus lij suv milta, de lij gájka vuoptajt juo láŋŋga gádodam.

Tsuojggima biesskediddjes

Ulmutja vuojno vuoptajda dal jáhpes jáhpáj rievddá. Lars-Bjørnar duola dagu dálla bob-frisyjrraj lijkku, juska ittji dijmmá dav gierda.

– Ittjiv dasi åvvå lijkku. Valla huj ruvva rievddá, ja dálla de lijkkuv. Ja de la suohtas dav biesskedit.

Ja dálla l buorre vuoptajt ållu oadnen biesskedit, jus sidá biesskediddje-rádijt tjuovvot.

– Hiervvi vuoptajt ja dåbdå fresh, hæjttá Lars Bjørnar.

• Lågå aj ietjá tjállagav julevsábmáj:
  Berustibme duodjáj le vuodo sunnuv gaskan