Diimmá rájes lea Oslo gielda viiddidan sámi álbmotbeaivvi doaluid Norgga oaivegávpogis 150 sajiiguin, ja mearkkaša ahte dán jagi lea sadji 400 guossái.
– Buot mánát eai beasa searvat
– Dattetge eai beasa buot mánát searvat doaluide, dadjá sámi mánáidgárddi váhnenovddasteaddji, Mihkku Tostrup Østmo, ja gohčoda váilevaš gulahallama duogážin dasa go dákkár dilli dál lea čuožžilan Norgga oaivegávpogis.
Oslo gielda dat lágida iđitborramuša Oslo ráđđeviesus, gosa suohkan lea ráddjen sadji 400 guossái. Sierra doallolávdegoddi dat lea mearridan movt bileahtat dán jagi doaluide galget juhkkojuvvot.
Ožžo liigebileahtaid
Sámi mánáidgárddi jođiheaddji Máre Helander muitala ahte mánáidgárdi diibmá oaččui 40 bileahta, ja ožžo dan seamma dán jagige, vaikko dán jagi rájes dárbbašit maiddái mánát bileahta doaluide.
Helander muitala ahte mánáidgárddis leat 27 máná, ja dasa lassin guokte váhnema guđege mánnái ja velá bargit. Go ožžot dušše 40 bileahta, de dat mearkkaša ahte olu mánát eai oaččo váhnema mielde doaluide.
– Eai leat dieđihan ahte dárbbašit eanet
– Mánáidgárdi lea ožžon bileahtaid doaluide, ja sii šaddet ieža dan juogadit dan mielde mii sidjiide orru buot eanemus vuoiggalaš, dadjá doallolávdegotti miellahttu Ann Finbog.
Son jearrá manne mánáidgárdi ii leat juo čoahkkimis dieđihan ahte dárbbašit eanet bileahtaid. Kampen skuvla, gos Oslo sámegieloahpahus lágiduvvo, lei álggos ožžon 50 bileahta, ja go váide, de sii ožžo velá liige 25 bileahta, muitala doallolávdegotti miellahttu Ann Finbog.