Lei vuordán eanet gussiid Kárášjoga beassášdoaluide

Kárášjoga festiválaid buvttadeaddji Anne Berit Anti lea obbalaččat eanemus duhtavaš lávvordat-doaluiguin Kárášjogas, After-X, maid Kárášjoga mohtorsearvi lágidii.

Duhtavaš beassášlávvordaga konsearttain

– After-X-konsearttas ledje nu máilmmi olu olbmot ja hirbmat buorre trøhkka. Mus ii leat lohku galle olbmo ledje, muhto lei spagga dievva, lohká Anti, ja muitala ahte dohko čáhket sullii 900 guossi.

Anti lea maid duhtavaš go sis lea leamaš viiddes prográmma, mii álggii disdaga ja bisttii lávvordahkii. Kárášjogas lei gaskavahku Sandra Lyng, Morgan Sulele ja Innertier konsearta maid Bivdu lágidii. Doppe ledje sullii 450 olbmo ja okta Bivddu eaiggádin Ann Silja Guttorm lea duhtavaš go bohte olbmot dohko.

Mari Boine konsearta lei daid konsearttaid searvvis maid Kárášjoga festiválat lágidedje dat konsearta mas ledje eanemus olbmot, oktiibuot sullii 340 olbmo.

– Dainna leat oalle duhtavaččat, ja Maris lei máilmme buorre konsearta, lohká Anti.

Ii duhtavaš guosseloguiguin

Vaikko lea duhtavaš viiddis prográmmain, de ii leat Anti duhtavaš guosseloguiguin.

Konsertii skilleduorastaga Kárášjoga gieldda 150 jagi ávvudeami oktavuođas bohte sullii 230 guossi oktiibuot, earret eaktodáhtolaš bargiid. Dalle ledje seaguhan šáŋŋeriid, go Ámmun Johnskareng, Elin Kåven ja Intrigue čuojahedje.

– Kárášjotolbmot bohte maŋŋit olggos, sullii dalle go Intrigue álggii čuojahit. Dainna eat leat duhtavaččat, muhto dat geat leat ovdal bargan beassášfestiválain lohket ahte go lea skilleduorastat ja dien mađe olu guossit, de lea buorre.

Árvvoštallat gáržžidit prográmma

Anti muitala ahte Kárášjoga festiválat áigot dál evalueret beassášdoaluid, ja evalueret dan ahte álggahit go sii beassážiid beare árrat, ja ahte ferte go maŋidit rahpandoaluid.

– Dál lea rahpan maŋŋebárgga, ja šaddet máilmme olu konsearttat, maŋŋebárggas lávvordahkii. Jus čohkket ja gáržžidit beassážiid, de jáhkán ahte šaddá buoret. Obbalohkái eat leat duhtameahttumat, muhto leimmet gal vuordán eanet olbmuid, erenoamážit skilleduorastaga.

Okta sivva manne soitet unnán olbmot boahtán, soaitá leat go leat seaguhan šáŋŋeriid ja go konsearttat álge veahá árrat, árvvoštallá Anti.

– Kárášjogas eai oainnat vuolgge olggos ovdal maŋŋel gaskaija.

Ruđalaččat jáhkká Anti Kárášjoga festiválaid birgen.

– Vuolláibáza gal ii šatta, muhto leimmet vuordán eanet olbmuid.

Vaikko eai leatge áibbas duhtavaččat guosseloguiguin, de leat goitge hui optimisttat boahtteáiggi ektui.

– Mis lea máilmme buorre prográmma ja sisdoallu ja máilmme olu doalut, ja mii oaidnit ahte jagis jahkái šaddá buoret dáppe. Jus mii gáržžidat prográmma, de jáhkán ahte eai šatta nu beare olu doalut ja eanet olbmot bohtet, lohká Anne Berit Anti.

Oktibuot 3000 olbmo fitnan doaluin

Guovdageainnu sámi musihkkafestivála jođiheaddji Nils Johan Vars lea duhtavaš iežaset doaluiguin.

– Mu mielas ledje buorit doalut, mii leat duhtavaččat. Ledje hui olu olbmot min doaluin, oktiibuot njealji beaivvis ledje sullii 3000 olbmo. Eanemus olbmot ledje lávvordaga, ja dat láve dat stuora beaivi. Guhkesbearjadat lei nai buorre. Badjel 700is fitne bearjadaga báktehárjjis ja lávvordaga ledje sullii 900 olbmo.

Vars muitala ahte Sami Grand Prixas ledje olu eanet olbmot go ovddit jagiid.

– Gehččiid dáfus lihkostuvaimet dán jagi bures, jođiheimmet buot 700 bileahta. ja diibma ledje vuollel 400 geahčči.

Dán jagi ii gullon Sámi Grand Prix radios, muhto lei vejolaš interneahta bokte geahččat sáddaga. Vars lohka dan doaibman sin bealis bures.

– Streama doaimmai hui bures, muhto nugo nu gulan de ii leat min streamas mihkke boasttuvuođaid. Muhto dat leat máŋggas geat leat váidalan , ja dat sáhttá leat danin go ii lean nu jođánis neahtta sis.

Lágidii bussemátkki Sančuari-konsertii

Ovdal beassážiid lei olu sáhka das go Sančuari čuojaha Kárášjogas, iige Guovdageainnus beassášlávvordaga. Guovdageainnu fitnodat Ailo mátki & tourist lágidiige dan dihte Kárášjohkii bussemátkki beassášlávvordaga After X-konsertii, gos earret eará Sančuari čuojahii.

Fitnodaga eaiggát Johan Aslak Hætta muitala NRK Sápmái ahte busse čuvvo Kárášjohkii 16 olbmo ja ruovttoluotta 18 olbmo. Busses lei sadji 50 olbmui.