– Olbmot lávejit dadjat, ahte lea dakkár lihkohisvuohtabeaivi. In dieđe leašgo duohta, dadjá Máhte Máret, Marit Anti.
Máhte Máret muitala ahte son lea oktii bártidan bearjadaga 13. beaivvi.
Son muitala, ahte oktii son biillain bártidii meahccegeainnus.
– Dalle šattaime mu manjiin guođđit biilla dohko muhtin soavleroggái, ja de vázzit ihku olbmuid lusa, muitala Máhte Máret.
Leatgo eambbo várrugas dán beaivve go muđuid?
– In mun dal hirbmasit smiehta, muhto go oainnán kalendaris ahte lea bearjadat ja golbmanuppelogát de smiehtan ahte soaitá miinu geavvat dalle, dovddasta Máhte Máret.
– Vahku maŋimuš bargobeaivi
Margrethe Vars muitala, ahte sus eai leat leamaš makkárge vásáhusat, mat dahket ahte son jurddaša dát beaivi dal livččii fuonit go eará bearjadatbeaivvit.
Margrethe Vars ii leat eanet várrugas otne go eará beivviid.
Foto: Anne Inger Birkely / NRK– Dát lea maŋimuš bargobeaivi ovdalgo vahkkoloahppa álgá, vástida Vars ja himáhallá.
Jáhkátgo dán beaivvi gevvet eambbo lihkohisvuođat go eará beivviid?
– Mus ii leat gal dat vásáhus, lohká Vars ja bárdá oaivvi.
Leatgo eanet várrugas dán beaivve go eará beivviid?
– In. Mun gal in leat. Dát láve eanaš áiggiid hui buorre beaivi.
Leago dus leamaš makkárge erenoamáš vásáhusat dán beaivvi?
– Eai. Mus gal eai leat leamaš dakkár vásáhusat, mat dahket ahte jurddašan dát livččii fuonit beaivi go eará bearjadatbeaivvit, vástida Vars.
Videos mii lea bajimusas dán čállosis gulat ja oainnát maiddái maid Jan Morten Simonsen ja Ragnvald Aslaksen dadjaba.
Stuorra lihkohisvuohtabeaivi
Bearjadat 13. beaivi lea dalle go mánu golbmanuppelogát beaivi lea bearjadaga alde. Dát dáhpáhuvvá unnimusat oktii ja eanemustá golbmii juohke jagi, čilgejuvvo
Jus mánnu álgá sotnabeivviin, de lea 13. beaivi bearjadaga alde. Oarjeeurohpálaš, erenoamážit eaŋgalasgielhálli riikkain lea beaivi čadnon heajos lihkkui dahje lihkohisvuođaide.
Bearjadat 13. beaivi.
Foto: Bjørn GrimenGávdnojit unnán gáldut mat muitalivčče man boaris dát jáhku lea. Norggas lea unnán mii čájehivččii, ahte beaivi lea navdojuvvon lihkohisvuohta- dahjege bártebeaivin ovdal 1800-vuođđologu.
Eai gávdno makkárge čálalaš gáldut mat muitalivčče mo dát jáhku lea álgán, muhto kristtalaš vieruid mielde lea bearjadat guhká adnon lihkohis beaivin go Jesus han jámii bearjadaga.
Guhkesbearjadat leage navdojuvvon erenoamáš lihkohis beaivin. Lohku 13 lea navdon lihkohis lohkun máŋgga kultuvrras go dat lea eahpesymmetralaš leaskalohku (dárogillii; oddetall).
