Girjjis lea sáhka viđa jahkásaš nieddážis Iiddás. Son fáhtehallá leukemija borasdávdii, mii lea borasdávda varas. Dáinna dávddan jápmá nieiddáš.
Lossat lei čállit jápmin fáttás
Lossadin lohká lean čállit girjji, go son illá hálidii čállit ahte nieiddáš jápmá, muhto go son lei mearridan čállit buozalmasvuođas ja jápmimis, na de fertii son das čállit. Lossat lei maid čállit danne go girji galggai heivet mánáidgárde- ja smávvaskuvllamánáide. Iige čálus galgan soarditge geange. Muhto duohta eallimis geavva maid nu ahte mánát jápmet, danne fertii son beare čállit das.
Girječálli muitala iežas fuomášan čállit girjji buožalmasvuođas ja jápmimis, dannego ieš lea bargan dakkár sajiin gos oinniid mánáid buohcamin iešguđetge laganaš dávddain ja oinniid maid ahte muhtin mánát jápme dávdii mainna buhce.
Ieš vásihii mánnán jápmima lagaš bearrašis
Iežas muitala maid mánnán vásihan ahte olbmot su lagasbirrasis jápme. Áhkkus mielde finai son máŋgii girkogárddis áddjás hávddi alde, doppe oinnii áhku čierrumin ja hállamin morrašis. Danne hálidii son čállit girjji mas ii lean dakkáraš ilolaš loahppa, dábálaččat han mánáidgirjjiin lea ilolaš loahppa, muhto ii hal dábálaš eallimis leat álo beare illu.
Girječállis lea sámi duogáš
Beate Heide lea čállán teavstta girjái, ja dáiddár Inger Kaurin lea hápmen govaid dasa. Soai leaba goappašagat Ánddásullos eret. Heide muitala iežas leat sámi sogalaš, muhto dan son ii diehttán ovdalgo 2001s. Danne hálidii son maid girjji sámegillii.
Skániid Girje lea almmustahttán girjji. Sámediggi, Nordlándda Fylkkagielda ja Várdobáiki Sámi kulturguovddáš leat ruhtadan almmustahttima.
Garra logus «Iiddáš ja Guovssahas»
Skáiniid Girjje lágádusa jođiheaddji Asbjørg Skåden muitala lean lossat lohkat mánusa maid Beate Heide buvtti lágádussi. Iežas muitala gatnjaliid sihkodan seammás go logaid girjemánusa, seamma dahke maid earát geat barge girjjiin ovdal almmustahttima.
Barneboka Liten Ida og Nordlyset
