Hopp til innhold

Iske searaid NM-juniorgilvvuin Alttas

Davvi-Norgga nuorat ribahedje vuoittuid Mátta-Norgii NM juniorvuodjangilvvuin. Buoremusat birgii Kárášjoga vuojadansearvvi valaštalli Kaia Norbye.

Kaia Norbye (Karasjok svømmeklubb / Kárášjoga vuojadansearvi)

Kaia Norbye lei dušše logádasaid duohken beassames vel ovdalii bohtosiid listtus 50 m raddevuodjamis.

Foto: Piera Balto / NRK

Álttá gávpogii Oarje Finnmárkkus ledje dáid basiid čoagganan Norgga valimus nuorat vuojadeames.

Norggameašttir juniorvuodjangilvvut álge doppe duorastaga ja bistet sotnabeaivve eahkedii.

Badjel 400 nuora oassálastet gilvvuin. Finnmárkkus leat kvalifiserendáid gilvvuide okta Girkonjárggas, okta Álttás ja guđas Kárášjogas. Romssa gávpogis ges golmmas.

– Ovdánit dađistaga

Kjetil Andersen

Kárášjoga vuojadansearvvi hárjeheaddji lea duhtavaš NM-gilvvuin vaikko gilvvus ii boahtan ge vuoitu Finnmárkku nuoraide.

Foto: Piera Balto / NRK

Vaikko eanaš vuoittuid leat váldán valaštallit Mátta-Norggas, de leat maid Finnmárkku nuorat čájehan ahte sii ge sáhttet gilvalit Norgga buoremus juniorvuoddjjin, oaivvilda Kárášjoga vuodjansearvvi hárjeheaddji, Kjetil Andersen

– Mu mielas leat min nuorat bures vuodjan, kreatsaoláhusaid leat ožžon, ja jáhkan ahte dá lea dat maid leimmet ge sáhttit ovddalgihtii vuordit go Norgga valimus nuorain gilvalat, mu mielas lea maid nuorat čájehan ahte ii livčče olui duohken ovdalgo sii ge beasašedje finálain gilvalit, lohká Andersen.

Kreatsaoláhusat

Kárášjoga vuodjansearvvi gilvaleaddjit, njeallje nieidda, bidje earret eará moadde kreatsaolahusa. Guokte dáin leat sátta-vuodjamis, dahje stáfehtain.

4x100 m friddja vuodjamis bidje Kárášjoga nieiddat ovtta dáin olahusain áiggiin 4.03.01. Dien vuodjamis bohte nieiddat nubbin iežaset heatas, ja sii geat ledje mielde joavkkus leat Kaia Norbye, Helene Andersen, Ida Nystad Nilsen, Elle Norvang.

Loahpas bođii Kárášjoga vuojadansearvi dán 100 mehtar friddjavuodjamis 13 sadjái.

Gilvvu vuite Bærumssvømmerne-nieiddat, Mátta-Norggas, olggobeal Oslo, áiggiin 3.46.45.

Nubbin ges bođii Lambertseter vuojadansearvi Oslos, áiggiin 3.48.30.

Kárášjoga vuojadansearvvi nuorat junior-NM gilvvuin Álttás

Karášjoga vuodjansearvvi nuorat Kaia Norbye, Helene Andersen, Ida Nystad Nilsen, Elle Norvang bidje ođđa kreatsaoláhusa 4x100 m vuodjamis.

Foto: Piera Balto / NRK

Logádasat earuhedje buoret bohtosa

Kárášjoga vuojadansearvvi Kaia Nordby lei gaskabeaivve rádjai sotnabeaivve birgen buoremusat vuojadeames daid davvinorgalaččain.

50 m raddevuodjamis bođii son 9 sadjái, áiggiin 33.71. Ledje dušše logádasat mat earuhedje su ovdalii boahtemis gilvvus.

Elida Hole vuittii 50 m raddevuodjama áiggiin 31.80. Son ovddasta Bergen vuojadansearvvi.

Junior NM Alta 2015

Valaštallit liekkadeamen ovdal vuojadangilvvuid sotnabeivve.

Foto: Piera Balto / NRK

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.