Hopp til innhold

Ii ožžon šat luohttámuša joatkit

Sámiid Vuorká-Dávviriid eaiggátstivrra lea válljen ođđa jođiheaddji.

Thoralf Henriksen

Thoralf Henriksen ii šat beasa joatkit Sámiid vuorká-dávviriid eaiggátstivrra jođiheaddjin.

Foto: Piera Balto / NRK

Thoralf Henriksen ii ožžon šat luohttámuša joatkit Sámiid Vuorká-Dávvirat eaiggátstivrra jođiheaddjin. Su sadjái nammaduvvui stivralahttu Hjalmar Strømeng, čállá Ávvir.

Hjalmar Strømeng

Stivrrajođiheaddji Hjalmar Strømeng.

Foto: Berit Marie Lise Eira / NRK

Sámiid Vuorká-Dávviriid (SVD) vuođđudusa bearráigeahččanlávdegoddi válljii mannan vahkkus ođđa stivrra SVD eaiggátstivrii ja ikte almmuhii ođđa stivralahtuid.

Bearráigeahččanlávdegotti, mas lea váldi válljet ođđa stivrra, ovdaolmmoš Asta Mitkijá Balto lea ilus go leat ožžon ođđa olbmuid ođđa stivrra SVD eaiggátstivrii, mii doaibmagoahtá ođđajagemánu 1. beaivvi.

Hjalmar Strømeng lea ovdal čohkkán stivrras ja lea válljejuvvon stivrajođiheaddjin ja dasa lassin leaba Jon Aarseth Meløy ja Synnøve Solbakken-Härkönen válljejuvvon stivrralahttun.

Várrelahtut leat nummaraston. Vuosttaš lea Eilif Norvang, nubbi lea Anne Toril Eriksen Balto ja goalmmát lea Inga Ravna Eira.

Korte nyheter

  • Dieđihit eambbogo 30 goddon Israelea falleheamis Syriijas

    Siviila olbmot ja soalddáhat galget leat goddon israelalaš áibmofalleheamis Syriijas, syriijalaš eiseválddiid dieđuid mielde.

    Eanetgo 30 olbmo galget dieđuid mielde goddon.

    Dieđuid mielde galgá Israel fallehan Aleppo gávpoga mannan ija diibmu 01.45 báikkálaš áigge.

  • – Alimus Hálddahusriekti bággeha ii-sápmelaččaid Sámediggái 

    Sámiráđi ságadoalli Áslat Holmberg oaivvilda, ahte Suoma Alimus Hálddahusriekti (AHR) badjelgeahččá sámi álbmoga.

    – AHR lea ođasmahttán mearrádusaid, mat leat gávnnahuvvon rihkkut sápmelaččaid vuoigatvuođa friddja politihkalaš ortniiduvvamii, oaivvilda Holmberg.

    AHR lea mearridan, ahte mannan čavčča sámediggeválggaid galgá lágidit ođđasit.

    Riekti lea gieđahallan badjel čuođi sámediggeválggaid válgalogahallama ja válgabohtosa guoski váidaga.

    – AHR fas bágge Sámedikki dohkkehit 72 ii-sápmelačča ižas jienastuslohkui. Ná áitá Sámedikki legitimitehta sápmelaččaid ovddastanorgánan, cuiggoda Holmberg.

    Aslak Holmberg
    Foto: Piera Heaika Muotka / Sámiráđđi
  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi