Hopp til innhold

Historjjálaš beaivi

Vuossárga lei historjjálaš beaivi máilmmi álgoálbmogiidda, go Ovttastuvvan našuvnnaid lahttoriikkat ja álgoálbmogat sohpe ođđa dokumeanttas.

Aili Keskitalo i FN

Vuossárgga lei Norgga Sámediggepresideanttas Aili Keskitalos sáhkavuorru ON álgoálbmot máilmmikonferánssa rahpamis.

Foto: Liv Inger Somby / NRK

Presideanttat ja ministarat miehtá máilmmi ledje čoahkkanan vuossárgga New Yorkii dohkkehit WCIP, álgoálbmot máilmmikonferánssa loahppadokumeantta. Dokumeanta geatnegahttá stáhtaid nannet álgoálbmotvuoigatvuođaid.

Dát dokumeanta lea historjjálaš, oaivvilda Nobel ráfibálkkašumi vuoiti Rigoberta Menchú Tum.

- Buot deháleamos lea geavahit dán dokumeantta buoridit álgoálbmogiid dili, dajai Rigoberta Menchú Tum vuossárgga, loahppadokumeantta ovttajienalaš dohkkeheami maŋŋá.

Nannoset šiehtadus

Brende møter Keskitalo i New York

Sámediggepresideanta Aili Keskitalo ja olgoriikaministtar Børge Brende deaivvadeigga ovdal máilmmikonferánssa rahpama.

Foto: Liv Inger Somby

Iežaset sáhkavuoruin muittuhedjege álgoálbmotnjunnošat stáhtaid das, man dehálaččat vuođđovuoigatvuođat eatnamiidda leat. Sii celke ahte álgoálbmogiid birgejumi ferte nannet, ii ge doadjit.

Maiddái Norgga olgoriikaministtar Børge Brende mielas lei dát dehálaš beaivi.

-Njealji jagi bargu nohka dál stuorra ON álgoálbmotkonferánssas. Norgga bealis leimmet áigon vel nannoseabbo šiehtadusa, muhto dan eat olahan, dadjá Brende.

Illubeaivi

Norgga Sámedikki ovddeš presidentii, bargiidbellodaga Egil Ollii lea dát illubeaivi.

Egil Olli

Sámedikki ovddeš presideanta Egil Olli lea duđavaš dainna ahte loahppadokumeanta lea dál viimmat dohkkehuvvon.

Foto: Carl-Gøran Larsson / NRK

-Ferten giitit sin geat leat bargan dáinna ja nagodan oažžut stáhtaid ja álgoálbmogiid ovttaoaivilii. Dat ii leat álkes bargu leamašan daidda geat leat bargan dainna. Mun lean hirbmat ilus otne ja ferten buot álgoálbmogiidda sávvat lihku viidáseappot dáinna bargguin, lohká Olli.

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.