Guovdageainnus lea stuorra beroštupmi Sámiid dearvvašvuođa ja eallindilleiskkadeapmái man Romssa universitehta dál čađaha. Olbmot háliidit diehtit makkár dávddat sis leat ja vel dan, ahte mo sáhttá easttadit dáid. 63 jahkásaš Láhpoluobbal almmái Lars Ailo Gaino čilge dá manne son vulggii iežas iskkahit.
- Hui dávjá olbmot ožžot váibmosiva ja máŋggas dieđus maid jápmet dasa. Son jáhkká máŋgasis dál eanet beroštupmi dasa ja olbmot leat várrugabbot go ovdal, muitala Gaino.
Buorre dahkat juoidá iežas buorrin
Dán dearvvašvuođa iskkadeamis sáhtát iskkahit váibmosiva, sohkardávdda, alla varradeattu- mo lea čoavjemihttu. Šattat deavdit skovi mas muitalat maid borat, šattat almmuhit juhkandábiid, bátnedikšuma ja mo muđui lea fuolla.
Mázelaš Anne Márjá Gaup Eira lei vuolgán iskkahit iežas dearvvašvuođa ja eallindili.
Mo lea erohus searvat dákkár iskkadeapmái, go mannat fástadoaktára lusa?
- Dáppe leat ráhkkanan oalle bures vuostáiváldit olbmuid, dat lea eará go fitnat doaktáris, čilge Eira.
Guovdageaidnulaččat leat sakka viššalabbot iskkahit iežaset. Romssa universitehta vásiha ahte dearvvašvuođa iskkaheapmi ii lean seamma bivnnut Kárášjogas. Dát lea dáhttu duohken, lohká Ristiinná Gaup Grønmo, gii jođiha báikkálaš iskkademiid.
- Dáppe orrot olbmot váldimin vuohkkasabbot vuostá dan, ahte geahččalit dahkat juoidá iežaset dearvvasvuođa ávkin.
Mázelaš Asllat Ante Eira mielas lea dát buorre fálaldat ja vel nuvttá.
Sáhttet gávdnat buohccuvuodaid
Iskkadeamis lea maid okta buorre bealli; muhtimat geat leat boahtán, leat ožžon dieđu, ahte sii fertejit vajot doaktára lusa, lohká Grønmo.
- Jus lea nu várálaš dilli, de sii ožžot dan olbmo dakkaviđe doaktára lusa, dahje sii sáhttet ávččuhit olbmuid váldit doaktárii oktavuođa muhtin vahkkuid dahje mánuid siste, muitala Grønmo.
Anne Márjá Gaup Eira mielas lea buorre dalán juo gullat makkár leat bohtosat.
- Dáppe ožžon vel gullat, ahte galggan iežan fástadoaktára dáhttut iskat, man olu dárbbašan borrat dálkasiid, ii soaitte leat nu olu go dál, lohká Eira.
Dat mii lea buorre dáinna leago muhtin dávddaid fuomášit iskkadettiin ja nu šaddet sii jođánit doaktára lusa, muitala Ristiinna Gaup Grønmo, iskkadeami báikkálašjođiheaddji.
GULDAL:
