Eurohpá buoremus ii čippos UEFA:i

Joavkku presideanta baicca vásttosta Eurohpá spábbačiekčama stivrenorgána UEFA, mii ráŋggui joavkku maŋŋá go oidit sevve katalonalaš flákkaiguin Champions League loahppačiekčamis Berlinas geassemánu álggus.

Barca bealušta sátnefriddjavuođa

– Barcelona lea agibeaivve bealuštan ja áigu agibeaivve bealuštit sátnefriddjavuođa, iige leat goassege gieldán lahtuidis dahje oidiidis ráfalaččat albmanahttimis jurdagiiddiset

dahje dovdduideaset spábbačiekčangiettis dahje mátkkoštettiin, dadjá joavkku presideanta, Josep Maria Bartomeu, Washington Post aviisii.

Barcelona spábbačiekčansearvvi jođiheaddji ii loga Barca doahttalit ráŋggáštusa, muhto áigu baicca gáibidit Eurohpá spábbačiekčama stivrenorgána UEFA ođđasit árvvoštallat ášši.

30 000 euro sáhkkun

UEFA sáhkkohii mannan duorastaga FC Barcelona 30 000 euroin, dahje 284 000 Norgga kruvnnuin, dan dihtii go joavkku oidit sevve Katalonia flákkaiguin Champions

League finálas Juventusa vuostá Berlinas geassemánu álggus, dieđiha ođasdoaimmahat AP.

UEFA lohká Eurohpá meaštáriid, Barcelona, rihkkon stivrenorgána njuolggadusaid, mat gildet čájeheames oskkoldatlaš, politihkalaš ja čearddalaš dovdduid.

Barca doarjjui iehčanasvuođajienasteami

FC Barcelona doarjjui Katalonia guovlluráđđehusa eahpevirggálaš álbmotjienasteami skábmamánus diibmá, mas jearaldat lei rohttemis Katalonia sierra Espánjas.

Joavkku oidit leat dávjá ja maŋimuš jagiid badjel albmabuktán spábbačiekčamiin politihkalaš dovdduid ja oaiviliid mat dorjot Katalonia iehčanasvuođa ja vuosttaldit Espánja duolbmama katalonalaččaid giela, kultuvrra ja ruhtadili.

Barcelona lea maiddái dovddus go sitkadit vuostálasttii diktáhtora Franco, gii fascisttalaš politihkain ráđđii Espánja 1939 rájes 1975 rádjái.

Válladedje gonagasa oaidnut

Lassin dán áššái lea Espánja spábbačiekčanlihttu ráhkkaneamen ráŋggáštit joavkku go oidit njurgo dan botta go espánnjalaš nationálalávlla čuojahuvvui Copa del Rey loahppačiekčamis Barca ruovttugiettis Camp Nou giettis miessemánu loahpas. Espánja gonagas Felipe VI lei čuovvumin čiekčama.

Joavku man vuostá Barcelona čievččai, lei Athletico Bilbao, mii gullá Euskadii dahje Báskaeatnamii. Galledeaddji joavkku oidit serve katalonalaččaid njurgumii ja válladeapmái espánnjalaččaid gonagasa gullut ja oaidnut.

Olugat jáhkket Espánja stivrejeaddji bellodaga Partido Popular bággestallat spábbačiekčanlihtu gokset katalonalaš spábbačiekčanjoavkku, čállá Washington Post. Vejolaš ráŋggáštus sáhttá leat bágget joavkku čiekčat kámppa gehččiidhaga vái manaha dietnasa.

Guoddala ráŋguma

Barcelona áigu láhkabealušteddjiidis vehkiin guoddalit UEFA sáhku. Searvi čállá: "FC Barcelona váldá vuhtii UEFA mearrádusa Champions League finála birra mii dieđihuvvui

jovkui duorastaga, muhto joavku ii guorras mearrádussii, earenoamážit go UEFA áirras lea govvidan Barca lahtuid ja oidiid geavahusa ovddolažžan, sihke ovdal ja maŋŋil čiekčama, nu go sin raporttas lohká."

-Mii oskut ahte joavkku ja dan lahtuid vuoigatvuođat eai leat dohkketmeahttumat dálá njuolggadusaid vuođul, cealká FC Barcelona espnfc.com dieđuid mielde .