Dav jus ga ássjelistan lij dåssju dat ájnna ássje dan biejve.
Dav subtsas suohkanoajvve Tor Asgeir Johansen. Sij dárbahi ájn nuppev tjåhkanimev åvdås li ássjijn Åvddånammadusá bieles gærggam, ja máhtti dav suohkanstivrraj åvdedit, tjielggi sån.
– Ejma ålli ássjev giehtadallat dán bále. Mij manájma tjadá gájkka tsuojggidusájt ma li boahtám ja dat váldij ájgev. Mij ham dáv vierttip snivvaláhkáj gehtjadit vaj sjaddá buorre boados suohkanstivrraj gå galggi mierredit, dættot Johansen.
Divtasvuona suohkanoajvve Tor Asgeir Johansen.
Foto: Sander Andersen/NRKJurram måttijt jagijt
Barggo Divtasvuona ådå suohkanplánajn la jurram juo badjel niellja jage.
2010 mierredij Divtasvuona suohkan álgadit bargov ådåstuhtátjit suohkanplánav sihke sebrudakoasev ja arealplánav. Ådå sebrudakoasev mierredij suohkanstivrra juo tjavtjan 2012, valla ådå arealplánajn ij la mannam sæmmi álkket.
- Lågå:
- Lågå aj:
- Lågå aj:
Oajvvadus ådå arealpládnaj suohkan rájáj guláskuddamij dijmmá dálve. Valla guláskuddamin båhtin nav edna vuosteldime almulasj ásadusájs ja garra vuosstálasstema álmmugis jut suohkan vierttij rievddadit muhtem åsijt ja ådå tjåhkanimijt almulasj ásadusáj tjadádit.
Boados dát bargos sjattaj jut suohkan vas nuppádis biejaj pládnaoajvvadusáv guláskuddamij.
Dán nubbe guláskuddamij li aj boahtám ållo vuosstálasstema álmmugis ja muhtem vuosteldime almulasj ásadusájs. Gå guláskuddamájgge någåj lidjin boahtám 45 tsuojggidusá ja moalgedime pládnaj. Ja dálla maŋŋel dán nuppát guláskuddama le de Divtasvuona åvddånammadus tjåhkkåham guhtta tijma ja gæhttjalam mannat tjadá gájkka tsuojggimusá ma pládnabargguj li boahtám.
– Boahtte bále la ájggomus ållit ássjijn Åvddånammadusá bieles vaj bessap arealplánav suohkanstivra åvddåj biedjat, subtsas Johansen.
Guollebiebmadimæládus hásstal
Tor Asgeir Johansen ij tjiegada gå jur guollebiebmadimæládus le dat stuorámus hásstalus dán bargon.
Divtasvuona suohkana oajvvadus ådå arealkárttaj. Gatjálvis le gånnå vuonan galggá sadje guollebiebmadimæládussaj ja gånnå ij galga æládus liehket.
Foto: Harrieth Aira / NRKGatjálvis le jus guollebiebmadimæládus galggá stuorrut ja jus æládussaj galggi vatteduvvat ådå saje gåsi mierdijt biedjat. Arealplánan ham mierkkiduvvi gåsi ja gåggu guollebiebmadimareála vuonan galggi ja makkir guovlo vuonan gånnå ij galga guollebiebmadibme.
Sij gudi plánajn li barggam li oajvvadam Divtasvuona sisŋemus vuonajn ij galga guollebiebmadibme ietján gå dat mij juo la ásaduvvam Oarjjevuonan, ja ådå saje guollebiebmadibmáj galggi Divtasvuona davemus vuodnaguovlojda biejaduvvat.
Suohkanoajvve Tor Asgeir Johansen javllá dát la båktåm edna dágástallamijt ja vuosstálasstemij viesádijs.
– Gåktu merraareálajt adnet buktá dágástallamijt. Galggap vaddet ienep sajev guollebiebmadimæládussaj vaj ep gus la dat mij stuorámus dágástallamijt buktá. Oajvvadusán li vuoroduvvam muhtem ådå gallegasj sajijt guollebiebmadimæládussaj, tjielggi Johansen.
Sån dættot guollebiebmadimæládus le Divtasvuodnaj boahtám ja æládussaj vierttiji saje vuoroduvvat.
– Merraæládus ja merrabiebbmobuvtadibme le ájnas æládus ja dat la ájnas midjij dáppe. Æládus stuorru ja sjaddá åvddånahttet. Så mån vuordáv æládus aj åvddånahttá vaj buorre ja guoddelis láhkáj buvtat ja sjaddá miellagiddis tjuvvot mij dáhpáduvvá dagu divtugis mierdij vaj sij e nuorráj luojte gájkka. Ja mån luohtedav æládussaj. Viddnudagá dåjmadi jiermmásláhkáj ja sjaddi vuojnnet aj dát æládus viertti rievddat dagu ietjá industrija sebrudagán, ja maŋenagi sjattasj boados buorre, jáhkká Johansen.
Divtasvuona åvddånammadus ij la ájn gærggam subtsastittjat álmmugij ma littji politihkkárij tjoavddusa dájda hásstalusájda. Dasi dárbahi ájn avtav biejve aktan ságastit.
– Iv de jahke mij háhppidip ássjev suohkanstivra åvddåj åvdedit boahtte suohkanstivrraj mij la dán máno, valla dán tjavtjabielen galggá gájkka gárves, jáhttá Johansen.
