Norgalaččat spellet sullii 35 millárdda ruvnnu ovddas ruhtaspealuin. Sullii 250.000 olbmuin lea dát šaddan oassi iežaset eallimis, čuvgejit «Spilleavhengighet-Norge» searviv.
Lill Tove Bergmo jođiha Spilleavhengighet-Norge searvvi ja lea Deanus eret. Son muitala ahte Finnmárkkus eai olbmot huma rahpasit dákkár áššiid birra, ja ballu lea ahte olbmot eai duostta hupmat dáid birra go ballet ahte leat heajubut go earát dan geažil, dahje heahpanit go leat geavvan dákkár dillái.
Bergmo muitala ahte sorjevašvuohta lea buozalmasvuohta masa buohkat sáhttet geavvat goas nu, ja jus eai oza veahki de sáhttá váttis beassat eret dilis.
Bergmo ii jáhke ahte Finnmárkkus eai leat olbmot geat leat darvánan ruhtaspealuide.
– Ollugat Norggas sorjevaččat ruhtaspealuide
Norggas leat sullii 250.000 olbmo geat leat rohttašuvvan juogalágán ruhtaspellui. Muhtin olbmot darvánit guhkit áiggi mielde, muhto dávjá lea ahte muhtin lea vuoitán stuorit ruhtasupmi ja de hálidivčče vel eanet vuoitit
– Dan muitalit sii geat váldet oktavuođa, čilge Spilleavhengighet-Norge jođiheaddji Lill Tove Berg.
Go olmmoš dorvvasta dákkár spealuide, de dávjá ii leat asttu šat olbmáide. Máŋggas vealgáduvvet ja loahpas geavahit eanaš áiggi dákkár ruhtaspealuide, váruha Bergmo.
Vuosttáš gearddi go lágiduvvo poker Norggameašttirgilvu
Dán vahkkoloahpa lágiduvvui vuohččan lobálaš Norggameašttirgilvu pokerspealus Gardermoenis Mátta-Norggas, gos lagábui 2000 olbmo serve.
Juohkehaš bijái 5000 ruvnnu speallui, ja buoremus spealli vuoitá 1,5 milliovnna ruvnnu. Lagabui 2000 spealli mákse oktiibuot badjelaš 9 miljon ruvnnu ovdalgo speallagohte.
Ráisalaš, Eirik Bjørklund (32) lei okta sis gii searvvai dán gilvui. Bjørklund vuittii sullii 3000 ruvnnu speallamis.
Bjørklund lea speallan pokera 12 jagi ja son ii jáhke ahte pokerspealus sáhttá atnit nu olu ruđa ahte šattašii sorjevaš dasa ja vealgáiduvvá.
– Diehttelas sáhttá manahit olu ruđa jus darváná neahttapokeri, lohká son.
Bjørklund muitala maid ahte juohkehaččas lea ásttoáiggedoaibma, ja son lea válljen pokerspeallama dákkár doaibman go su mielas lea dat somá.
Sámi suohkaniin váddát muitalit speallanváttisvuođain
Spilleavhengighet Norge jođiheaddji, Lill Tove Bergmo jáhkká ahte lea váddát sámi suohkaniin dovddastit, ahte olbmot leat darvánan ruhtaspealuide, go leat unna gilážat.
Sámi kultuvra lea maid nu ahte lea váttis muitalit servodaga váttisvuođain, erenoamážit jus lea sáhká psyhkalaš váttisvuođain. Dan vásihii goit Bergmo ieš go orui Deanus.
Loahpas ávžžuha Spilleavhengighet Norge jođiheaddji, Lill Tove Bergmo, váldit oktavuođa vaikko lea lossat, go sii sáhttet ovttas čoavdit váttisvuođa.