Reerenasse daam orre tjïelten jorkesem buakteme guktie ussjedamme jijnjh tjïelth aktene stoerre tjïeltese ektiedidh. Raarvihken tjïelte mubpie åarjelsaemien guektiengïelen reereme tjïelte sjidti.
Saemien reereme tjïelte maahta gaarvanidh.
Raarvihken tjïelten åejvie Arnt Mickelsen tjoeperde saemien aamhtsi bijre jis tjïelte stuerebe sjædta.
– Daate tjoepere sjædta jis dihte tjïelten reereme dubpielisnie. Vaenebe saemien aamhtsi bijre daejrieh. Vaenebe saemieh stoerre tjïelesne årroeminie. Eah saemma laakan dah saemien aamhtsi bijre pryjjedh, Mickelsene jeahta.
Saemien reereme tjïelten barkoe.
Fylhkeålman tjïelte direktøøre Hans Brattås, Nrk Trøøndelaagese jeahta, dah saemien reereme tjïelteh tjuerieh jijtje daejtie saemien aamhtside vaarjelidh. Maam daan bijre jeahtah?
– Dihte lea dihte stoerre gyhtjelasse! Reereme dåajvoehtisteme, edtjieh sjiere øørnegh buektedh. Guarkebe daam dihte geerve stoerre tjïeltesne sjædta, Mickelsene jeahta.
Noerhte Trøøndelaagen saemien siebrie sæjhta digkiedidh.
Dah tjïelth, edtjieh daelie tjïelkestidh magkeres tjïelte gujmie sijhtieh aktanadtedh. Noerhte trøøndelaagen saemien saervien åvtehke Grethe Dunfjeld bælla, daate stoerre håajpeme sjædta.
– Gåessie stoerre tjïelte sjædta, dellie tjoerebe vihth aalkoeraajeste samien jielemen vuekien bijre bïhkedidh. Håajpeme sjædta jih mijjien reaktojde vaarjelidh, Dunfjelde jeahta.
Noerhte Trøøndelaagen saemien siebrie tjåanghkose bøørie njoektjen 7.b. Snåasesne, gusnie edtjieh tjielten jorkesen bijre raarastalledh jih digkiedidh guktie daate guektien gïelen reereme dajve daan stoerre tjïeltesne sjædta.