– Dálla ij mige dáhpáduvá ja ep ga majdik diede. Ja gå gatjádip mij dáhpáduvvá de dat duostoduvvá.
Sån gut dav tsuojggi la akta bidumsáme guovdátja Duoddara Ráfe álgadiddjijs ja guovdátja åvdep stivrrajådediddje, Finn Strand, Bájddárin.
Sån ij la dudálasj bidumsáme guovdátjijn, Duoddara Ráfe maŋŋel gå Duoddara Ráfe stivrra rievdaj ja ådå jådediddje guovdátjav jådedahttjájin. Sån tjuottjot dálla ij diehttu mij guovdátjin dáhpáduvvá.
– Midja lim ham bidumsiebre sebrulattja ja lip fáron vuododusán valla ep åvvå diede mij Duoddara ráfen dáhpáduvvá. Ja gå gatjádip mij danna dáhpáduvvá de javlli ij dát midjij gullu, javllá Strand.
Sån subtsas moattes li sunji riŋŋgum ja sihtam li goarrit bidumsáme guovdátja milta ja gæhttjat mij dánna dáhpáduvvá valla sij båhti stieggidum uvsajda.
- Lågå aj:
Duosstu lájttalimev
Duoddara Ráfe stivrrajådediddje Sven-Roald Nystø duosstu lájttalimev, ja vuoset njuolgadusájda mij stivrriji dákkár guovdátjijt.
–Duoddara Ráfe stivrriduvvá daj njuolgadusáj milta ma li uddni ja ma li fámon, ja dat merkaj guovdásj stivrriduvvá dagu dábálasj guovdásj, javlla Nystø.
Sån subtsas Duoddara Ráfe bæjválasj jådediddje la esski sadjáj boahtám.
–Mij lip ienep rudájt oadtjum Duoddara ráfáj Sámedikke baktu ja dálla le guhkesájge pládna hábbmima vuolen.
Nystø mujttádahttá bihtámsáme e dåssju Bájddárin åro.
–Mij oadtjop aj bidumsámijt ságajda ma årro Bájddára ålgusjbielen. Ja navti oadtjop gåbdep vuojnojt ma li ájnnasa bidumsámijda, dættot sån.
Sámedigge rievdaj stivrrimvuogev
Da lij Sámedigge mij 2012 ietjájduhtij stivrrimvuogev bidumsáme guovdátjin.
Dav subtsas Vibeke Larsen gut dalloj tjåhkkåhij ájrrasin åvdep Sámedikkeráden. Sån la dálla Barggijbelludagá Sámedikkejuohkusa jådediddje ja gullu Sámedikke opposisjåvnnåj.
Sån subtsas Sámedigge sidáj válldet stuoráp åvdåsvásstádusáv sáme kultuvrrainstitusjåvnåjs, ja dan diehti rievddin dáj guovdátjij stivrrimvuogev.
–Mij hálijdijma stuoráp åvdåsvásstádusáv válldet. Duoddara Ráfe-guovdátjij rievdaj dát jut Sámedigge nammat guokta ájrrasa Duoddara Ráfe stivrraj, madin bidumsáme siebre nammadi guokta stivrraájrrasa ja duodden nammat Bájddára suohkana avtav stivrraájrrasav.
Åvdep Sámedikkeráde dan diehti nammadij åvdep sámedikkepresidentav, Sven-Roald Nystø Divtasvuonas ådå stivrrajådediddjen. Maŋŋáj la aj Sámedigge nammadam Ingrid Lien, Skierrestádes stivrraájrrasin.
–Mij hálijdijma ulmutjav gænna l máhtudahka ja máhttelisvuohta låggŋit Duoddara Ráfev vehi badjelij sáme sebrudagán, dættot Larsen.
Rijddo duogátjin
Valla åvdep stivrrajådediddje Finn Strand lájttá gå bidumsámij guovdásj jådeduvvá iehtjádijs gå bidumsáme ietja.
– Mij hálijdip guovdátjin galggi bidumsáme ieneplågon gudi stivran tjåhkkåhi ja jådedi bidumsáme guovdátja dåjmajt. Mij sihtam aktisattjat barggat gejda la luondulasj aktisattjat barggat, diehttelis dav. Valla Duoddara Ráfe stivran galggi bidumsáme ieneplågon liehket, dættot sån.
Dasi vásstet Vibeke Larsen:
– Jur dalloj gå ådå stivrra galgaj nammaduvvat de lidjin rijdo bidumsáme berustimij gaskan jus dåhkki nav javllat. Sámedikkeráde dan diehti politihkalattjat árvustaláj dilev jut Sámedigge ittjij galga válljit avtak bielev, juogu nuppev jali nuppev, ienni válljijma ulmutjav jådedittjat gut la ålgusjbieles vaj vehi sjávvunahttet dájt rijdojt. Bidumsáme birrasin ettjin guorrasam makkir guovlluj vádtset, javllá Larsen.
Duoddara Ráfe stivran tjåhkkåhi dá:
Stivrrajådediddje Sven-Roald Nystø, Divtasvuonas, nammaduvvam Sámedikkes.
Stivrraájras Ingrid Lien, Skierrestádes, nammaduvvam Sámedikkes.
Stivrraájras Erik Gabrielsen, Bájddáris ja stivrraájras Lennart Ranberg, Fuoskos, nammaduvvam bidumsáme siebrijs.
Stivrraájras Laila Gabrielsen, Bájddáris, nammaduvvam Bájddára suohkanis.