– Vuorddemusá dåssju akti dáhpáduvvá

Vásse vahko oattjoj sámedikkepresidænnta suohkanstivran hållat, ja danna bajedij ássjev aktisasjbarggosjiehtadusá hárráj Divtasvuona ja Sámedikke gaskan. Sierraláhkáj lij dal giellaássje guovddelin.

– Ep la ållu dudálattja Sámedikke bieles. Moatten jagen ij la Divtasvuona suohkan nahkam rudájt gålådit majt Sámedigge l gielladåjmajda juollodam, javllá sámedikke presidænnta.

Suhttam ja tjierrum

Divtasvuona suohkan la má dájt maŋemus jagijt 1,5 millijåvnå kråvnå binnebuv gållådam gå majt Sámedigge l juollodam, ja dav la de Karl Edvard Urheim oadtjum dåbddåt, gen ieddne lij boarrásijvieson Gásluovtan ja guhti ittjij oattjo dajt fálaldagájt majt lagámusá gatjádin.

– Dát ássje le nav gávkas gå gålmmå jage dán åvddål gádodin giellabarggev boarrásijvieson Gásluovtan. Maŋŋáj oadtjop media tjadá gullat huoman gávnnu rudá.

Urheim la suhttam ja muhtem bále aj tjierrum dán ássje åvdås.

– Dát la illastibme almasjárvos ja almakrievtesvuodas.

Bæssá nuktalusájn

Divtasvuona suohkan bæssá dán bále nuktalusájn, ja nav li de duodde rudá suohkanin ma de galggi aneduvvat dasi masi ajtu galggi.

– Sivá li dal Divtasvuona suohkana háldadusán mij la nav dahkam vaj tjuoggánam li rudá. Valla dágástallam lip Sámedikkijn, ja miján li plána gåktu rudájt gållådit Sámedikke njuolgadusáj milta, vásstet suohkanoajvve Tor Asgeir Johansen.

Bielnup millijåvnåv la Divtasvuona suohkan sierra foanndaj biedjam. Sámedikkepresidænnta Aili Keskitalo ja Divtasvuona suohkan li guorrasam gåktu Divtasvuona suohkana guovtegielalasjrudá galggi boahtte ájge aneduvvat, valla Keskitalo ij la ållu dudálasj.

– Mujna li vuorddemusá dát dåssju akti dáhpáduvvá, ja sávav juo boahtte jahkáj lip Divtasvuonan giellabargujn åvddånam. Duodden dán dile diehti Divtasvuona suohkan le ruhtadårjav massám ma dá budsjehtajagen máhttin aneduvvat, javllá Sámedikke presidænnta.