Akte aamhtese dennie båatsoesaemien mïerhkevuekie seminaaresne mij lij Stiklestadesne daan våhkan orreme, leah guktie mïerhkide daan daata- basesne tjaaleme. Daejtie daata- mïerhkide gaavna båatsoe reeremen sæjrosne jallh gåessie edtjh mïerhkem jeatjah internedte sæjrosne ohtsedidh. Lars Aage Brandsfjell, Saanti sijteste tuhtjie nåake-laakan mierhkide guvviedamme jih tjaaleme.
– Eah leah daejtie nejpie-giejide tjïelke-laakan tjaaleme. Ij mïerhkide damtijh gænnah. Guktie daelie tjoerem moenedidh magkeres nejpiegïejem tjaaleme.Nemhtie ij edtjh årrodh, Brandsfjelle jeahta.
Buerebe daata programmh nuhtjedh.
Nejla Joma, Tjåehkeren sijteste, tuhtjie tjuerieh daam bueriedidh.
– Dah mij leah daejnie barkeme, nåake barkoem dorjeme. Daelie maahta gaajhkem guvviedidh jih aaj daata programmh nuhtjedh mij maahta tjaeledh jih vuesiehtidh guktie dah mïerhkh edtjieh vååjnedh, Joma jeahta.
Barkoe mïerhkemoenehtsidie.
Klååkeme moenehtsen åvtehke Leif Anders Somby mij daejtie mïerhkeaamhtside gïetedalla, jeahta daate leah barkoe mïerhke moenehtside.
– Daate lea barkoe mïerhkemoenehtside jih båatsoesaemide. Dellie edtjebe mijjieh Laanteburrie direktoratem eevtjedh jih mïerhkide daatabasesne staeriedidh, Somby jeahta.