Gávccinuppelotjahkásaččat Karolina Boman ja Ingrid Henriksson, Johkamohkis, leaba skuvllas oahppamin movt galgá fitnodaga jođihit. Dás soai leaba appa válljen ráhkadit. Appa gálggašii gárvanit ovdal Johkamohki dálvemárkaniid go dalle čoagganit ollu olbmot Johkamohkkái geat dárbbašit dieđuid das mii márkanáiggi dáhpahuvvá.
Visot dieđut Johkamohki birra
Appas galgá gávdnat visot maid dárbbaša diehtit Johkamohki birra. Sihke rahpanáiggiid, fitnodagaid telefonnummariid, oaidninveara sajiid ja dáhpáhusaid sáhttá gávdnat appas. Appa galggašii leat ávkin sihke turisttaide ja guovllu olbmuide.
Rimas čálliba
Sudno mielas lea somá lohkat juoidá go lea čallon rimas ja danne visot maid čálliba appii galgá lea rima. Dát álkida lohkat dieđuid, lohkaba ieža.
Gielddahoavda liiko appii
– Lea hui buorre vuohki olahit turisttaide ja kundariidda, lohka Johkamohki gielddahoavda Anders Nygårds. Su mielas lea dát hui buorre jurdda ja heive bures dál go ollu olbmot atnet telefovdna juohke beaivvi.
Vuovdit appa ja tiinet ruđaid
Soai sávvaba ahte buot Johkamohki fitnodagat searvvašedje sudno appii. Sudnuide máksá veahá ráhkadit appa ja danne fertejit fitnodagat mat háliidit dieđuid dohko, máksit smávva ruđa dan ovddas. Dál vuos eaba tiinne appain maidige, muhto go skuvllas geargaba boahtte geasi, de soaitá boahtit ruhta.
– Moai háliidetne vuovdit appa muhtin fitnodahkii, lohká Ingrid Henriksson. Dalle appa maid ain gávdno maŋŋá go soai geargaba iežaska fitnodagain.