Nu čállá
sin neahttasiiddus.Badjelaš guovtti jagi áigi galge politiijat doalvut dievddu giddagassii Áltái. Dán mátki oktavuođas rigerii 45-jahkásaš ja čolgadii politiijabálvá njeaiga gii vikkai su doallat gitta politiijabiillas. Go politiijat galge bidjat dievddu giddagassii, de biehttalii dievdu dán ja dan oktavuođas čievččestii ja čorbmadii son nuppi politiijabálvvá.
Goddináitagat
Ovddit geasi ges áittii 45-jahkásaš dievdu nuppi guovdageaidnulaš dievddu báhčit dahje goddit. Go politiijat válde dievddu gitta, de áittii son politiijabálvá jápminduomuin ja logai iežas áigut čievččastit politiija. Beaivvi maŋŋel gohčodii seamma politiijabálvá «biro cihppanjamanin» ja ovdal go guđii leansmánnikantuvrra de čurvii sutnje «sieg heil» ja dagai nazi-dearvvuođaid.
Guokte mánu maŋŋel dáid dáhpáhusaid čuggii dievdu niibbiin ruskkalihti ja seamma niibbiin áittii son čugget muhtin nissonolbmo.
Biehttala
Áktor gáibidii dievddu 120 beaivái giddagassii, beali áiggis galggai čohkkát. Dievdu mieđai belohahkii áššálažžan veahkaválddálašvuođas, son biehttalii dikkis áitán olbmuid goddit ja son čilgii maiddái ahte politiijat orrot leamen su vuostá go dávjá váldet su gitta. Dievddu bealušteaddji oaivvildii ahte dievdu galgá beassat áššiin.
Geavva čohkkát
Dievdu lea ovdal dubmehallan veahkaválddi ja áitagiid geažil, maŋimus háve skábman jagi 2013. Sis-Finnmárkku diggegoddi dubme dievddu 90 beaivái giddagassii, son gártá čohkkát 45 beaivvi, muhto dás gessojit 9 beaivvi eret háldogiddagasa geažil. Son ferte maid máksit 3000 ruvnno áššegoluid ovddas.