Finnmárkku Fylkkamanni mearridii čavget ráŋggášteami sidjiide geat aktiivvalaččat hehttejit boazolohkama maŋŋel go Lákkonjárgga orohaga eallu ii lohkkon go guokte siidaoasaža eaba boahtán lohkamii buozalmasvuođa geažil, eaba ge lean ovddasteaddji sádden lohkamii.
– Mii mearrideimmet čavget dán ráŋggášteami maŋŋel go Lákkonjárgga ealus maŋidedje lohkama, lohká Hætta.
Eanandoallodirektoráhta boazodoallo ossodaga sekšuvdnahoavda Liv Berit Hætta deattuha ahte dát ođđa njuolggadus ii váikkut mohte ge Lákkonjárgga orohaga dáhpáhussii, muhto das ovddos guvlui..
Sáhkkojit plánejuvvon lohkanbeaivvi rájes
Boazolága almmolaš boazolohkkan njuolggadusain čuožžu earet eará nuppi paragráfas ahte siidaoasi jođiheaddji dahje sadjásaš maid son vállje geatnegahtto láhčit boazolohkama fylkamannái, ja geatnegahtto maid leat mielde lohkamis. Váilevaš heiveheapmi dahje oasseváldin sáhttá mielddisbuktit sáhkuid.
Hætta čilge ahte sáhkku lea guokte ruvnno beaivái juohke bohcconammii.
Son guhte lea hehtten aktiivvalaččat boazolohkama lea dássážii sáhkkohuvvon jahkemolsašumis 01.01.xxxx, muhto ođđa ráŋggášteami ektui sáhttet boazodoalloeiseválddit ráŋggáštit boazodoalli dan beaivve rájes go boazolohkama ledje plánen čađahit.
Ná čilge Hætta maid eiseválddit oaivvildit doahpagis: "boazodoalli gii aktiivvalaččat hehtte boazolohkama.
– Jus lea nu ahte boazodoalli ii boađe lohkamii. Leaš dál nu ahte son ii hálit dahje eai leat gávdnan ovddasteaddji gii sáhttá ovddastit sin siidaoasi.
Manne lehpet čavgen dán njuolggadusa?
– Danne go midjiide lea dehálaš čuovvut ja iskkat leatgo boazodoallit unnidan iežaset boazologu siidaoasi mearriduvvon boazolohkui, lohká Liv Berit Hætta.
Ballabehtetgo sabotášas?
Hætta ii áiggo vástidit dása.
– Mus eai leat makkár ge oaivilat diesa. Dien fertejit ealáhusas vástidit.
Lakkonjárgga orohatovdaolmmoš Hans Ole Eira biehttala ahte boazodoallit iešmielat hehttejit lohkama.
– Ii mis gal lean oktage gii biehttalii leahkit mielde lohkamis, muhto guokte siidaoasi jođiheaddjit leigga buohccit ja soai eaba áigon lohkkat. Eará siidaoasi jođiheaddjit gal ledje boahtán gárdái vehkkiiguin ja gearggus lohkkat iežaset bohccuid, lohká Eira.
