Hopp til innhold

– Fertejit gal čiekčat

Sámi almmáiolbmojoavkku hárjeheaddji, Isak Ole Hætta, lohká váidalahtti go masse saji dán gease Conifa EM čiekčamiin.

Conifa World Cup 2014 dag 3
Foto: Sergey Gavrilov / NRK

FA Sápmi lei jearran Conifas fitnet maŋidit dieđihan áiggi EM;i, muhto dat ii dohkkehuvvon ja Monaco fitne sámi saji dieid čiekčamiin.

Isak Ole Hætta lei hárjeheaddji maid mannan gease go sápmi čievččai Conifa máilmme meaštár čiekčamiin Staares, muhto gos eai lihkostuvvan.

– Fertejit beassat čiekčat

Hætta lei sávvat ahte ledje beassat čiekčat, vaikko eai lean buoremusaid fitnet mielde EM-čiekčamiidda dán jagi ge, ráidočiekčamiid geažil.

Conifa EM álgovuorru lea Londonis, muhto loahppačiekčamat sullos Isle of Man.

Jos sámi galgá beassat čiekčat stuorra doaluin nu go EM;s, de fertejit čiekčat ja vuoitit, vuoi ollu čuoggáid fidnejit, go dieid čiekčamiidda váldet daid buoremus joavkkuid mielde.

– Lean dieđihan min stivrii ahte fertejit gulahallagoahttit Conifan čiekčamiid birra, go dieđán doppe leat ollu joavkku mat dáhttot čiekčat, nu go mii, ja lea vuogas jos lea dakkár áigodagas go mii maid sáhttit buoremusaid fitnet mielde, lohká Hætta.

Ii beare ollu oktan

Sámi almmáiolbmojoavkku hárjeheaddji diehtá spábbačiekčanlihttu maid vuoruheamen nissonjoavkku ja nuoraidspábbačiekčama, muhto sávvá ahte eai álggat doaimmaid maid eai sáhte čađahit, earret eará ruhtavátnivuođa geažil.

Almmáiolbmot berrešit fas dán jagi beassat čiekčat, dan lean stivrii cealkán, muhto de čohkket nissonjoavkku vel.

Isak Ole Hætta lohká dárbu ollu čiekčat, jos vuos dáhttut dáid joavkkuid, ja son jáhkká stuorra vásáhus daid čiekčin geat mannan gease ledje Staares.

Korte nyheter

  • – Alimus Hálddahusriekti bágge ii-sápmelaččaid Sámediggái 

    Sámiráđi ságadoalli Áslat Holmberg oaivvilda, ahte Suoma Alimus Hálddahusriekti (AHR) badjelgeahččá sámi álbmoga.

    – AHR lea ođasmahttán mearrádusaid, mat leat gávnnahuvvon rihkkut sápmelaččaid vuoigatvuođa friddja politihkalaš ortniiduvvamii, oaivvilda Holmberg.

    AHR lea mearridan, ahte mannan čavčča sámediggeválggaid galgá lágidit ođđasit.

    Riekti lea gieđahallan badjel čuođi sámediggeválggaid válgalogahallama ja válgabohtosa guoski váidaga.

    – AHR fas bágge Sámedikki dohkkehit 72 ii-sápmelačča ižas jienastuslohkui. Ná áitá Sámedikki legitimitehta sápmelaččaid ovddastanorgánan, cuiggoda Holmberg.

    Aslak Holmberg
    Foto: Piera Heaika Muotka / Sámiráđđi
  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset