Anny Nilsen (72) vuojnná diedon ávkke la mobiltelefåvnnåj, dálásj ådåsamos mobiltelefåvnnåj aj ma li dagu dáhtámasjijna. Valla sån skurnnjeluddá adnemij dahkkár telefåvnåjs, ja balon la ulmutja e desti goade gaskajt asta vádtset, ja e rat asta barggat dåssju mobiltelefåvnå diehti.
– Vallak javllá “tikk”, de hæhttuji dav rahpat. Dat la de ájggesuola. Divna li agev nehtan, ja de galggi nehtan gæhttjat mij dán væráldin dáhpáduvvá. Juska li dal náv ságastime, vierttiji guovladit dasi majt dat subtsas.
E asta
Anny Nilsenin la, majt iesj gåhttju, dålusj mobiltelefåvnnå. Dahkkárijn mij dåssju dåhkki riŋŋgut ja SMSajt sáddit. Ja Nilsen fuohkki, ja buktá buojkulvisájt dálásj mobiltelefonadnemij.
– Lidjiv váren dán giese avta fáron. Vallak telefåvnnå javlaj “tikk”, de ga gæhttjat. Juska dal guollimin lij, de hæhttuj dasi gæhttjat. Ja nuppádis lidjiv. Nubbe galgaj láddit. Galgajma meintán láddit. Håv. Tjåhkkåjij båvnij nanna, ja duolla dálla guovladij.
Ávkken aj
Anny Nilsen dal aj vuojnná dálásj telefåvnå ávkken li, valla ballá dat nav ájgev suolát, ja ulmutja dajna ájgev gålådahtti ienni gå nuppij ságastit.
– Ij la dagu åvddåla gå iejvviji ulmutjijt mujttalit, gatjádallat ja ságastit . Valla dálla dal náv vádtsi, telefåvnnå bieljen. Gulá gå ber sáhkadi aktu allasisá. Ja e desti asta láddit ja guollit. Ja mån jáhkáv jus aktak nuorráj gahttja, e åvvå asta bierggit jus dal dát javllá “tikk”. Da la nav sjaddam dát værált.
Doarjoduvvá
Anny Nilsen doarjoduvvá mobiltelefåvnå vidnudagás Chess. Ietjas næhttabielen bádtjiji ulmutjijt binnedit mobiltelefåvnå adnemav.
– Bádtjip ulmutjijt båttåtjav válldet mobiltelefåvnås gå li nuppij siegen. Da la vargga nav sjaddam vaj ulmutja jáhkki massi juojddá jus tjalme agev ælla mobiltelefåvnån, javllá Chess-oajvve Arve Andreassen.
- Gehtja dál: Chess bádtji binnep adnemav mobiltelefåvnås.
Lassánam
Adnem dahkkár telefåvnåjs la hármmat lassánam dájt maŋemus jagijt. Dav vuoset varás statistihka Zenith Optimedias. Vuodna la dat rijkka guhti l åvdemusán mij guosská digitála mediajt adnuj válldet dagu dal ådå mobiltelefåvnåjt, næhttabrettajt ja TVav fibera baktu. Mijá ráddnárijkka Svierik la nælját sajen. Valla: vuonagij gaskan æjggu 65 prosenta ulmutjijs gåhtjos smart-mobiltelefåvnåv, mobiltelefåvnnå mij la dagu dáhtámasjijnna, madi svenskaj gaskan la 73 prosenta dahkkár telefåvnnå.
- Gehtja dál: Adnem mobiltelefåvnås la lassánam
