Ráissa suohkan nugo olu eará suohkanat, rahčet ekonomiijain. Danne evttoha Ráissa sátnejođiheaddji, John Karlsen vuolidit alcces mávssu boahtte jagá bušeahtas. Suohkanstivra galgá meannudit ášši odne. - Dát lea áidna vuohki gáržžidit iežaset boahtte jagi bušeahta, lohká John Karlsen.
John Karlsen ii loga dás nu olu praktihkalaš mearkkašumi, muhto eambbo symbolalaš dahkkun. Dán bokte áigu čájehit ahte sátnejođiheaddji maid unnida goluid dakko gokko sáhttá.
Karlsen deattuha ahte juohke ossodat suohkanhálddahusas ferte seastit boahtte jagi, ja de ferte maiddái sátnejođiheaddji bealis bargat.
Eanaš manná bálkkáide
Sulli čieža gávccilot proseantta suohkana goluin manná suohkanbargiid bálkkáide. Go sátnejođiheaddji dál árvala unnidit alcceses mávssu, de sávvá earáid maid ipmirdit ahte boahtte jahki šaddá ruđalaččat lossat buohkaide, ja ahte buohkat fertejit leat gergosat seastit.
Dábálaččat loktejit politihkkárat mávssu alcceseaset. Guokte vahku áigi árvaledje Unjárggas bajidit mávssu sátnejođiheaddjái. Ráissa sátnejođiheaddji ii hálit jietnadit maidege das maid eará sántejođiheaddjit barggažet, ii ge ávžžut čuovvolit iežas.
- Juohkehaš ferte ieš árvvoštallat mot lea buoremus bargat, deattuha Karlsen.
