Hopp til innhold

Guokte guovžža báhččon diibmá

Norggas báhččojedje dušše guokte guovžža diibmá earis mii lei 27.

Bjørn skutt i Gausdal

Čájáhusgovva báhččon guovžžas.

Foto: Privat

Luonddugáhtten direktoráhta seniorráđđeaddi Knut Morten Vang lohká, DNA-iskadeamit čájehit ahte guovlluin gos lei lohppi bivdit guovžžaid, doppe ledje unnán guovžžat diibmá.

Luonddugáhtten direktorahtta lea DNA-iskkosiid bokte registreren 151 guovžža Norggas diibmá, muhto dušše 38 guovžža leat registreren guovlluin gos lei lohppi bivdit guovžžaid.

Diimmá čavčča lei lohppi báhččit 27 guovžža Norggas, muhto dušše guokte guovžža báhččojedje. Okta varris báhččui Finnmárkkus ja fas okta njiŋŋelas guovža Romssas.

Vangen lohká guovžabivdu maŋgasiidda amas bivdovuohkkin Norggas, ja ahte bivdit fertešedje šaddát eanet juonalaččat jus bivdoeari galget juksat.

Oktiibuot lea direktorahtta registreren guhtta guovžabeassadaga Norggas, muhto eiseváldiid mihttu lea lasihit gitta 13 guovžabeassadahkái. Davviin hálida direktorahtta cegget guovžanáli Ánarjoga álbmotmeahccai, Passvihkái ja Romssa siseatnamiidda. Guovžžaid maid guđđet dáid guovlluide, leat dábálaččat varris guovžžat, ja daid lea lohppi báhččt bivdoáigodagas.

Vangen ii dieđe vel šattáš go guovžabivdu dán čavčča, go dan fertejit árvvoštallat ođđa DNA-iskkosiid bokte.

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.