GULDAL ÁŠŠI:
Vuvdet viidát
Otne lea gávpi okta dain áidna gávppiin gos oaččut oastit sámeniibbiid iešguđetlágan sturrodagáin. Steve Strømeng muitala iežaset vuovdit viidát sihke norggas ja olgoriikas.
Rávdii bálvalii olbmuid
Olles máilbmi lea šaddan gávpemárkanin. Gávpi mii álggahuvvui doaimmas Kárášjogas loahpas 1700-logus, ráhkadii iešguđetlágan rusttegiid máid dalá olbmot dárbbašedje bivdui, guolásteapmái ja eanandollui. Rávddis ráhkadedje maiddái ruovdeáisáid reagaide.
Ođđa gálvvut
Áigi lea rievdan ja olbmuin otná servvodagás leat earalágan dárbbut go dološ olbmuin ledje. Nu lea niiberávdii heivehan iežaset áiggi mielde. Dál ráhkadit earret eará sistti alá govaid.
Steve Strømeng lea okta sis gii lea viđát buolva Niiberavddis. Fitnodagás leat vihtta bargi geat buvttadit birrasit logi duhtá niibbi jagis. Dasá lassin ráhkadit maid duhtá gáffeseahka bohccosisttis.Fitnodagá váldobuvtta lea sámeniibi, ja dá muitala Steve manne son jáhkká iežaset lihkostuvvat gávppiin.