– Soajttá bidumsáme guovdásj bierri jådeduvvat?

Jus bidumsáme kultuvrra ja giella galggá ienebuv vuojnnut, bierri bidumsáme kultuvrra ja giella ienebuv tjalmostahteduvvat. Dav javllá sadjásasj stivrrajådediddje bidumsáme guovdátjin Duoddara Ráffe Lennart Ranberg.

– Tjalmostahttet bidumsámevuohtav la soajttá ájnnasamos. Jus ij dav nagá tjalmostahttet de bidumsáme sjaddá dahpa birás.

(Artihkal joarkká gåvå vuollelin)

Guovdátjav jådedit

Dálla gatját Ranbarg jus la muddo bidumsáme guovdátjav jådedit Dokmoas Bájddáris ietjá sadjáj.

– Nahkap ienebuv bijtámsámevuodav tjalmostahttet nanos guovdátja baktu. Soajttá bierri liehket ietjá sajen. Máhttet lij juonná E6a milta liehket, vaj ij la nav guhkken ierit. De máhtá oadtjot moadda guossijt. Tjanádum guovdátjij lij máhttet liehket dávvervuorkká, åhpadibme, dilmma, girjjevuorkká, vuosádusá.

– Lihpit gus jådedittjat?

– Ælla miján jådedimplána. Dá li ájádusá gåktu sihtap guovdátjin barggat. Strategiplánaj lip barggamin, ja danna åvdedip ájádusájt guovdátja boahtteájge birra.

Bijtámsáme guovlluj gulluji suohkana oarjje-Nordlándan vuona bielen ja Árjepluove ja oasse Arviesjávre suohkanis Svieriga bielen.

Ienep guovddusin

Bidumsáme guovdátja bæjválasj jådediddje Stig Morten Kristensen la strategiplanajn barggamin, ja gåktu NRKa dádjat la akta plánajs lagabuv gæhttjat dan gatjálvissaj guovdátjav ietja sadjaj biedjat.

– Soajttá akti ájgen dåjmaduvvap ienep guovddusin, vaj navti jåksåp ienep ulmutjijt. Guovdásj ienep guovddusin sjaddá aj lagábuv ålles bidumsáme guovlluj. Dákkir ájádus ij merkaha mij ep galga Dokmoan Bájddárin aj liehket.

– Vuogas la galla ienep guovddusasj guovdátjijn duola dagu mij guosská tjalmostahttemav.

Kristensen tsuojggi huoman guovdátjav jådedit vaddá hásstalusájt.

– Jus galggap jådedit de sjaddi hásstalusá ja gålo. Valla le galla máhttelis. Vuojnná dav gåktu sjaddá.

Máhtudahka gæssu

Bijtámsáme ratjik ja Duoddara Ráffe åvdep stivrrajådediddje Finn Strand ij ájádusáv vuostelda.

– Máhttelisvuohta le galgga guovdátjav ienebuv tjalmostahttet. Ihkap lij ávkken boahtet. Jus lip ienep guovddusin de lij máhtudahka ienebut gæssut guovdátjij. Valla vierttip bisodit Dokmoav, muv mielas. Valla iv ájádusáv vuostelda.

Aj kultuvrraguodde ja duodjár Torill Siversten doarjot guovdátjav ienep guovddusij ásadit.

–Mijá mielas de bierri liehket ienep guovddusin liehket, vaj vuojnnusij boahtá.